Úsh óńirde mal urlyǵymen aınalysqan uıymdasqan qylmystyq toptar ustaldy
ASTANA. KAZINFORM – Іshki ister mınıstrligi men onyń aýmaqtyq bólinisteri mal urlyǵyna qatysy bar adamdardyń qylmystyq áreketterin áshkereleýge baǵyttalǵan aýqymdy jedel-izdestirý is-sharalaryn júrgizdi, dep habarlaıdy Polisia.kz.
Nátıjesinde bir mezgilde Túrkistan, Jambyl jáne Shyǵys Qazaqstan oblystarynda júıeli túrde mal urlyǵymen aınalysqan úsh uıymdasqan qylmystyq top ustaldy.
Tergeý derekterine sáıkes, top músheleri ıeleri qaraýsyz qaldyrǵan jylqy men iri qarany erkin jaıylymnan urlap, olardy alys aımaqtarǵa aıdap aparyp soıǵan. Keıin etin bazarlarǵa ótkizgen.
- Jedel is-sharalar barysynda kúdiktilerden 55-ten astam urlanǵan mal tárkilenip, ıelerine qaıtaryldy. Qylmystyq toptardyń uıymdastyrýshylary men sybaılastary ýaqytsha ustaý ızolıatoryna qamaldy.
QR Qylmystyq kodeksiniń 188-1-babyna (Mal urlyǵy) sáıkes olarǵa 7 jyldan 12 jylǵa deıin bas bostandyǵynan aıyrý jazasy taǵaıyndalýy múmkin, - delingen aqparatta.
ІІM azamattardy tórt túlik maldy qaraýsyz qaldyrmaýǵa jáne joǵalǵan jaǵdaıda dereý polıtsııaǵa habarlaýǵa shaqyrady.
Aıta keteıik, munyń aldynda Túrkistan oblysynda mal urlyǵyn kásip etken 4 qylmystyq top ustalǵan bolatyn.