Sońǵy eki aptada úsh qaıǵyly oqıǵa: Taraz jáne Shý ákimderine sógis berildi
TARAZ. KAZINFORM — Jambyl oblysynyń ákimi Erbol Qarashókeev balalar men jasóspirimder arasyndaǵy quqyq buzýshylyqtyń jıilenip ketýine baılanysty shuǵyl keńes ótkizdi, dep habarlaıdy oblys ákiminiń baspasóz qyzmeti.
— Jańa oqý jyly bastalǵaly beri óńirde kámeletke tolmaǵandar arasynda asa aýyr qylmystardyń jıilep ketýi — jaǵdaıdyń ýshyǵyp bara jatqanyn kórsetedi. Bul máselege shuǵyl ári naqty sharalar qajet. Bala — bizdiń bolashaǵymyz! Erteńimizdiń jarqyn bolýy úshin biz olardyń qaýipsizdigi men tárbıesine, alańsyz bilim alýyna barynsha jaǵdaı jasaýǵa tıispiz. Sizderdi tyńdasaq, barlyq jumystar júrip jatyr, aýqymdy sharalar atqarylyp jatyr deısizder. Biraq, nátıjesin ózderińiz kórip otyrsyzdar. Sońǵy eki aptada úsh qaıǵyly jaǵdaı boldy. Demek, sizderdiń jumys tásilderińiz tıimsiz. Oqýshylardyń tárbıesi jóninde mektep, ata-ana, qoǵam úshtiginiń ózara birlesken jumystaryn basynan qaraý kerek! Qazirgi balalardyń kún saıyn oı-órisi ózgeriske ushyrap, kózqarasy basqasha qalyptasýda. Sondyqtan, bul baǵyttaǵy jumys tásilimiz de jańasha sıpatta qarqyn alý kerek dep oılaımyn! — deı kele oblys ákimi nátıjesiz jumystardy synǵa aldy.
Óńir basshysy buǵan deıin atalǵan másele boıynsha naqty tapsyrmalar bergenin, alaıda jaýapty tulǵalardyń qabyldaǵan sharalarynan naqty nátıje kórmeı otyrǵanyn qatań túrde eskertti.
Sonymen birge ár aýyldyq okrýgtiń jeke óz ýchaskelik polıtsııa ınspektory bolýy tıis ekenin alǵa tartyp, bos shtattardy shuǵyl tolyqtyrýdy júktedi.
Erbol Qarashókeev oryn alǵan máselelerge qatysty laýazymdy tulǵalarǵa tártiptik sıpattaǵy sheshimder qabyldady.
— Oblys ákimi apparatyna oblys ákiminiń orynbasary Serik Sálemovke «sógis», Taraz qalasynyń ákimi Baqytjan Orynbekovke, Shý aýdanynyń ákimi Baqytjan Jánibekovke, bilim basqarmasynyń basshysy Nurbek Orshybekovke, sondaı-aq áleýmettik salaǵa jaýapty Taraz qalasy ákiminiń orynbasary Ulana Slambekova men Shý aýdany ákiminiń orynbasary Naıman Sultanbaevqa «qatań sógis» túrindegi tártiptik shara qabyldaý tapsyryldy. Bilim basqarmasynan Taraz qalalyq jáne Shý aýdandyq bilim bólimderiniń basshylarynyń jáne ózge de jaýapty tulǵalardyń atqaryp otyrǵan qyzmetine sáıkestigin qarastyrýdy talap etti. Oblys ákimi jasóspirimder arasyndaǵy qylmystyń aldyn alý boıynsha shuǵyl zerdeleý tobyn quryp, ár bilim berý mekemesinde keńeıtilgen saýalnama júrgizip, onyń nátıjesi boıynsha tıisti jumystardy jedel uıymdastyrýdy mindettedi, — delingen ákimdik taratqan aqparatta.
Vedomstvo atap ótkendeı, bul qurylatyn top óńirdegi barlyq mekteptiń joǵary synyp oqýshylary men kolledj stýdentteriniń quqyqtyq saýattylyǵyn arttyrýǵa, qylmystyń saldary men zardabyn túsindirýge kúsh salýy tıis. Top jetekshisi retinde Taraz qalasy jáne aýdan ákimderi jeke jaýap beretin bolady.
Osyǵan deıin habarlanǵandaı, 13 qyrkúıekte Jambyl oblysynda jasóspirim mert boldy. Jaraqat alǵan oqýshyny úıine jetkizgenimen, jedel járdem kelgenshe ol kóz jumdy.
Sondaı-aq, jaqynda Tarazdaǵy mektep-ınternatta qyz balaǵa jasalǵan qorlyq týraly da habarlanǵan edi.
Budan bólek Talas aýdanynda kámeletke tolmaǵan balalar vıdeoúndeý jazyp, ógeı ákesi ózderin májbúrli jumysqa jekkenin, qorlyq kórip, soqqyǵa jyǵylǵandaryn aıtqan.