Úsh aıda ınternettegi alaıaqtar turǵyndar men memleketke 79,6 mlrd teńge zalal keltirdi

ASTANA. QazAqparat – Elimizde ınternet-alaıaqtyq qylmystary jıiledi. Bıyl úsh aıdyń qorytyndysy boıynsha bul baǵytta 10 myńnan astam quqyq buzýshylyq tirkeldi. Ol – ótken jyldyń sáıkes kezeńimen salystyrǵanda 1,8%-ǵa kóp, dep habarlaıdy QazAqparat ranking.kz portalyna silteme jasap.

Jalpy, alaıaqtyq qylmystarynyń jartysyna jýyǵy ınternette jasalǵan. Atap aıtqanda, 4,7 myń qylmystyq quqyq buzýshylyq tirkeldi. Ótken jylǵa qaraǵanda bul – 4,2%-ǵa kóp. 2022 jyldyń qorytyndysyna sáıkes, «Alaıaqtyq» baby boıynsha 43,5 myń qylmys tirkeldi. Onyń ishinde 20,6 myńy – ınternet-alaıaqtyq.

Árbir 5 alaıaqtyq qylmystyń ekeýi elimizdegi qos megapolıste jasalǵan – Almaty (І toqsanda 1 949 oqıǵa tirkelgen) jáne Astanada (І toqsanda 1 903 oqıǵa tirkelgen). Sondaı-aq, bul baǵyttaǵy quqyq buzýshylyqtar órship turǵan óńirler qatarynda Qaraǵandy oblysy (692 oqıǵa), Shymkent qalasy (640 oqıǵa) jáne Almaty oblysy (517 oqıǵa) bar.

Júrgizilgen zertteý qorytyndysyna sáıkes, respondentterdiń 55,8%-y alaıaqtar qýylyǵyn asyrmaq bolǵanyn aıtqan. Onyń ishinde 34,2%-y telefon alaıaqtary bolsa, 32,7%-y ınternet arqyly jasalǵan.

Osylaısha, bıyl І toqsanynda «Alaıaqtyq» baby boıynsha tirkelgen qylmystardan kelgen zalal 79,6 mlrd teńge boldy. Bul – ótken jylmen salystyrǵanda 6 ese kóp. Jalpy, byltyr jyl basynan sońyna deıin keltirilgen shyǵyn somasy – 110,8 mlrd teńge.

Sonymen, alaıaqtardyń qýlyǵyna aldanǵan qarapaıym turǵyndardyń zalaly – 30,4 mlrd teńge. Al, keltirilgen shyǵynnyń 48,8 mlrd teńgesi – memleketke, 515,7 mln teńgesi – bızneske tıesili.