Úsh aýysymdy mektepterdiń sany tórt ese qysqardy

ASTANA. KAZINFORM — Sońǵy jyldary Qazaqstanda balalardyń bilim alýyna zamanaýı jaǵdaı jasaý baǵytynda eleýli ilgerileý baıqaldy. Memleket basshysynyń tapsyrmasyna sáıkes, 2019 jyldan beri 1 mıllıonnan astam oqýshyǵa arnalǵan 1200 mektep salyndy, dep habarlady Oqý-aǵartý mınıstrligi.

Tek 2023-2024 jyldary 510 myń orynǵa arnalǵan 422 jańa mektep ashyldy.

Osy sharalardyń nátıjesinde elimizdegi úsh aýysymdy mektepterdiń sany 4 ese, apatty mektepterdiń sany 2 ese azaıdy, al oqýshy oryndarynyń tapshylyǵy 4 ese qysqardy.

- Memleket zamanaýı jáne qolaıly bilim berý ortasyn qurý boıynsha júıeli jumysty jalǵastyrýda. Jańa oqý jylynyń qarsańynda óńirlerde 115 myń oqýshyǵa arnalǵan taǵy 83 jańa mektep ashyldy, onyń 57-si «Keleshek mektepteri» ulttyq jobasy aıasynda salynǵan. Jańa mektepterdiń paıdalanýǵa berilýi Shymkent, Almaty qalalarynda, Aqmola, Qaraǵandy jáne Qyzylorda oblystarynda úsh aýysymdy oqytý máselesin tolyǵymen joıýǵa múmkindik berdi, - delingen vedomstvo dereginde.

Qazirgi ýaqytta elimizde 3000 mektep bir aýysymda, 5000-nan astam mektep eki aýysymda jumys isteıdi. Jyl sońyna deıin 140 myń orynǵa arnalǵan taǵy 111 mekteptiń qurylysy aıaqtalady.

Joǵaryda atalǵan jobalardyń júzege asyrylýy elimizdiń kóptegen óńirlerinde úsh aýysymdy oqytýdy joıýǵa jáne qosymsha 150 myń oryn tapshylyǵyn qysqartýǵa múmkindik beredi.

2025–2026 oqý jylynda elimizde jalpy syıymdylyǵy 267 myń oqýshyǵa arnalǵan 232 jańa mektep salynady. Sonymen qatar 245 mektep jańǵyrtýdan ótedi, taǵy 1000 aýyl mektebi modernızatsııalanady, al 680 mektepke 1100 zamanaýı pándik kabınet ornatylady.

Respýblıkalyq bilim berý uıymdarynyń ınfraqurylymy da jańartylýda. Túrkistandaǵy «Bilim-ınnovatsııa» lıtseıinde jáne Almatydaǵy Respýblıkalyq fızıka-matematıka mektebinde jóndeý jumystary aıaqtaldy, Almatyda «Abaı Ulttyq mektebi» jańa ǵımaraty qurylysynyń aıaqtalýy josparlanýda.

Aıta keteıik, Túrkistan oblysynda jańa oqý jyly qarsańynda 10 mektep ashyldy.