US Open: jasóspirimder arasynda Sonıa Jıenbaeva kelesi aınalymǵa ótti

ASTANA. KAZINFORM — Qazaqstandyq tennısshiler jasóspirimder arasynda AQSh ashyq chempıonatynda bastapqy matchtaryn ótkizdi.

Qazaqstandyqtardan WTA reıtıngisinde 779-orynda turǵan Sonıa Jıenbaeva ǵana jeńiske jetti.

Sonıa alǵashqy aınalymda áıelder reıtıngisinde 1330-oryndaǵy norvegııalyq Emılı Sarts-Lýndemen (№ 29 ITF Juniors) synǵa tústi.

Qazaqstandyq jas tennısshi qarsylasyn 7:6 (7:5), 6:3 esebimen qapy qaldyrdy. Báseke bir saǵat 25 mınýtqa sozyldy.

Jarystyń 14-raketkasy bolyp tirkelgen S.Jıenbaeva úshinshi aınalymǵa ótý úshin amerıkalyq Alanıs Hemıltonmen sheberlik talastyrady.

Asyljan Arystanbekova chehııalyq Elıska Tıshakovamen oıynda birinshi partııada 3:1 esebimen alǵa shyqqanymen, sol basymdylyqty ustap tura almady – 6:7 (5:7), 1:6.

Bozbalalar arasynda dodany irikteý saıystarynan bastaǵan Danıal Rahmatýllaev alǵashqy aınalymda shveıtsarııalyq Flınn Tomastan óte almady – 6:7 (4:7), 2:6.

Qazaqstannyń basty úmiti, ATP reıtıngisinde 1033-satydaǵy Ámir Omarhanov úshin bıylǵy US Open sátsiz boldy. Jarystyń 10-raketkasy bolyp tirkelgen Á.Omarhanov brazılııalyq Lýıs Gýto Mıgelge jol berdi – 6:7 (3:7), 3:6.

Eske sala keteıik, budan buryn AQSh ashyq chempıonatynda Anna Danılınanyń aralas synda shırek fınalǵa shyqqanyn jazǵan bolatynbyz.