Úrimji aýdanynda ártúrli ulttyq oıyndarynan keıin myń adamdyq qara jorǵa bıi bılenedi - sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Túrkııa eksporty 13,8 paıyz ósti - TRT
Túrkııa Statıstıka mekemesi syrtqy saýda derekterin jarııalady. Túrkııanyń 2024 jyldyń shilde aıyndaǵy eksport kólemi ótken jyldyń shilde aıymen salystyrǵanda 13,8 paıyzǵa ósip, 22 mıllıard 510 mıllıon dollarǵa jetken.
Bul týraly osy aptada Túrkııa Radıo Televızııa portaly habarlady.
Atalǵan BAQ-tyń dereginshe, Túrkııa Statıstıka mekemesi syrtqy saýda derekterin jarııalaǵan. Osyǵan sáıkes 2024 jyldyń shilde aıyndaǵy eksport kólemi ótken jyldyń shilde aıymen salystyrǵanda 13,8 paıyzǵa ósip, 22 mıllıard 510 mıllıon dollarǵa jetken. 2024 jyldyń qańtar-shilde aralyǵyndaǵy eksport kólemi ótken jyldyń qańtar-shilde kezeńimen salystyrǵanda 4,1 paıyzǵa artyp, 148 mıllıard 738 mıllıon dollarǵa shyqqan.
Qazaqstannyń Energetıka mınıstrliginiń basshysy Qytaıǵa saparmen keldi - «Halyq gazeti»
29-30 tamyz aralyǵynda Qazaqstannyń energetıka mınıstri Almasadam Sátqalıev bastaǵan qazaqstandyq delegatsııa QHR-ǵa resmı saparmen keldi dep jazdy Qytaıdyń «Halyq gazeti» QR Energetıka mınıstrligine silteme jasap.
Aqparat kóziniń keltirgen deregine súıensek, Qazaqstan Energetıka mınıstrliginiń basshysy QHR iri energetıkalyq kompanııalarynyń ókilderimen jáne memlekettik organdarmen birqatar kezdesýler ótkizgen.
Taraptar elderdiń energetıka salasyndaǵy yntymaqtastyǵynyń perspektıvalary týraly pikir almasty.
Sapar barysynda qytaı tarapy qazaqstandyq delegatsııany kompanııanyń kórme pavılonymen tanystyryp, Qytaı aýmaǵynda da, odan tys jerlerde de júzege asyrylyp jatqan jobalardy tanystyrǵan.
Qazaqstan elshisi sýretshi Oral Tańsyqbaevtyń óner týyndylarymen tanysty - «ÓzA»
Qazaqstannyń Ózbekstandaǵy Tótenshe jáne Ókiletti elshisi Beıbit Atamqulov ataqty sýretshi Oral Tańsyqbaevtyń Tashkenttegi memorıaldyq murajaı-úıine baryp, onyń óner týyndylarymen tanysty, dep habarlaıdy ózbekstandyq «ÓzA» aqparattyq agenttigi.
Ózbekstandyq BAQ-tyń dereginshe, bıyl Ortalyq Azııa elderiniń kórkem sýret óneriniń negizin qalaýshylarynyń biri Oral Tańsyqbaevtyń týǵanyna 120 jyl tolýyna oraı, osy mereıli data Qazaqstan men Ózbekstanda keńinen atalyp ótýde.
Elshi tanymal qylqalam sheberiniń syzǵan óner týyndylaryn, sondaı-aq onyń ómiri men shyǵarmashylyǵyn baıandaıtyn jeke zattary jáne muraǵattyq materıaldaryn qamtıtyn murajaı ekspozıtsııasymen tanysty.
Mýzeı dırektory Farhod Jalılovpen áńgimelesý barysynda dıpmıssııa basshysy kelesi jyly Qazaqstanda ataqty ózbekstandyq sýretshi Oral Tańsyqbaevtyń kórmesin ótkizý josparlanǵanyn atap ótken.
Aıta keteıik, Oral Tańsyqbaev 1904 jyly Tashkent qalasynda týyp, 1974 jyly Núkiste qaıtys bolǵan. Keskindemeshi, KSRO halyq sýretshisi (1963), KSRO Kórkemsýret akademııasynyń tolyq múshesi (1958). Oral Tańsyqbaevtyń ulty – qazaq.
Sondaı-aq osy aptada «ÓzA»-da «Regıstanda álem halyqtarynyń ánderi oryndalýda» degen taqyryptaǵy aqparat jarııalandy.
Keltirilgen málimetterge súıensek, «Shyǵys áýenderi» HІІІ halyqaralyq mýzyka festıvaliniń birinshi kúni samarqandyqtar men sheteldik týrıster túrli ult pen ulys ókilderiniń ulttyq ánderin tyńdady.
Atap aıtqanda, festıvaldiń birinshi kúni Bolgarııa, Latvııa, Sýdan, Grekııa, Úndistan, Qazaqstan, Iran, Túrkimenstan, Japonııa, Malaızııa, Mońǵolııa, Ázerbaıjan elderiniń ókilderi ulttyq ánderdi oryndaǵan.
Altaıdyń Móńke jaılaýynda dástúrli mádenıet festıvali ótti - «Altaı aqparat ortalyǵy»
25 tamyz kúni keshte «Jaılaýdaǵy halyqtyq salt-dástúr, Móńkedegi rok keshi» dep atalatyn Shyńjań halyqtyq mádenıet festıvali Altaı qalasyna qarasty Móńke jaılaýynda saltanatty túrde ashyldy, dep habarlaıdy Qytaıdyń «Altaı aqparat ortalyǵy» basylymy.
«Altyn sahara», «Altaıym», «Aı nury» qatarly týyndylardy ánshi, sazger Jan Chý sahnada oryndap, dombyra shertip tosyn syı syılasa, tanymal ánshi Araı Aıdarqanuly da jerlesterine erekshe ánderin tartý etti. Osy sııaqty kontsertpen qatar qyzqýar, kókpar, balýanǵa túsý qatarly ózgeshe tartymdy ulttyq sporttyq jarystar ótkizildi. Sonymen qatar qazaqtyń dástúrli kıiz basý óneri, qurt jasaý óneri kópshilikti tánti qylǵan. Ártúrli dámdi taǵymdar kóptiń kóńilinen shyqqan.
Qytaıdyń Gýandýn provıntsııasynan kelgen Hýan Shın Altaıdyń kórinisi óte kórkem ekendigin, ártúrli dámdi taǵamdardan dám tatqanyn, Móńke jaılaýyndaǵy sporttyq, mádenıet keshi kózaıasyn keńeıtkenin aıtqan.
Altaı qalalyq Mádenıet, sport, radıo-televızııa jáne saıahat mekemesiniń tóraǵasy Lı Iýn aıtýynsha, aldaǵy ýaqytta osy sekildi mádenıet, sporttyq jáne saıahat is-sharalaryn únemi ótkizý arqyly eginshi-malshylardyń kirisin arttyrýǵa kúsh salynbaq.
Úrimjiniń Nanshan taýynda myń adamdyq qara jorǵa bıi bılenedi - Harajorga
Aptanyń sońynda Úrimjinyń Nanshan taýynda eki kún boıy týrıstik mádenıet is-sharasy ótkiziledi. Úrimji aýdandyq mádenıet, sport, radıo, televıdenıe jáne týrızm bıýrosynyń habarlaýynsha, 31 tamyz kúni «Nanshan fırmasyndaǵy jylqy mýzyka festıvali» Lastaı kórinis aýmaǵynda ótkizilse, 1 qyrkúıekte Úrimji aýdanyndaǵy Shybaııangoý ıppodromynda «Tıanshannan týǵan jaryq aı» atty mádenı týrızm taqyrybyna arnalǵan is-sharalar ótedi.
Bul týraly osy aptada qytaılyq «Harajorga» áleýmettik jelisinde habarlandy. Atalǵan BAQ-tyń málimetinshe, bul joly ótetin eki kúndik sharanyń mazmuny baı bolǵandyqtan kórermenderdi qyzyqtyrmaı qoımaıdy.
Atap aıtqanda «Nanshan fırmasyndaǵy jylqy mýzyka festıvali» ótkiziletin kúni tústen buryn alańnan jylqy, syıyr, qoı, túıelerden quralǵan tańǵy shoýmen bastalady. Odan keıin ártúrli at óneri, qyz qýý sııaqty ulttyq at sporty oıyndary ótedi. Al tústen keıin, aqyndar aıtysymen jalǵasyn taýyp, ary qaraı myń adamdyq qara jorǵa bıi bılenedi. Sondaı-aq Shyńjańnyń ishi-syrtyna belgili ánshiler, orkestrler kópshilikke 40-tan astam án, kúı usynady.
«1 qyrkúıek kúni, Úrimji aýdanynda ótkiziletin 2024 jylǵy «Tıanshannan týǵan jaryq aı» atty mádenı týrızm taqyrybyna arnalǵan is-sharalarda kúres, at baıgesi sııaqty sporttyq oıyndarmen qatar qyz qýý, teńge ilý, kókpar, sondaı-aq, aqyndar aıtysy, ulttyq qolóner buıymdary men aýyl sharýashylyq ónimder jármeńkesi bolady», - dep dep túıindeıdi qytaılyq BAQ.
Irannyń 7 ǵasyrlyq tarıhy bar qupııaǵa toly kóne qamaly - Parstoday
«Falak ýl-aflak» qamaly – Irannyń Lýrıstan oblysynda ornalasqan eń mańyzdy tarıhı eskertkishteriniń biri. Qamal ulttyq mura tizimine tirkelgen. Sasanıler dáýirine (b.z. 3-7 ǵǵ) tıesili bul saltanatty qamal Lýrıstan oblysynyń Horramabad tóbelerinde ornalasqan. 7 ǵasyrlyq tarıhy bar qamal jyl saıyn kóptegen ırandyq jáne sheteldik týrısterdi qabyldaıdy, - dep jazady Irannyń «Parstoday» aqparat agenttigi.
Atalǵan aqparat agenttiginiń osy maqalasynda Lýrıstan oblysynyń asyl tasy «Falak ýl-aflak» qamaly jaıly keńinen baıandaıdy.
Irandyq basylymnyń dereginshe, «12 munara» degen atpen de tanymal «Falak ýl-aflak» qamaly – Horramabad qalasynyń ortasyndaǵy kóne tóbelerdiń ústinde ornalasqan. Ol 651 jyly Sasanıler zamanynda salynǵan eken. Tarıhı derekter boıynsha, qamal kóbine túrli patshalar ornalasqan rezıdentsııa bolǵan. Keıbir tarıhı kezeńderde ony túrme retinde de paıdalanǵan.
Atalǵan tarıhı qamaldyń jobasy týraly aıtar bolsaq, qamal 5300 sharshy metr aýdandy alyp jatyr. Tas, kirpish, shıki kirpish, alebastr men áktastan salynǵan.
Aıta keteıik, «Falak ýl-aflak» sózi «aspandardyń aspany» degen maǵyna beredi. Bul ataý Qadjarlar zamanynda (1789-1925) osy qamalǵa berilgen. Sol zamannan búginge jetip otyr. Shyn máninde qamaldyń ataýy kireberis qaqpasynda aspannyń on eki shoqjuldyzyn bildiretin 12 munaranyń bolýymen baılanysty bolýy múmkin. Budan bólek, qamal ataýy oǵan qol jetkizýdiń qıyndyǵyn bildiretin metafora bolýy yqtımal. Atalǵan «aspandardyń aspany» týraly jazylǵan maqalany «Parstoday» aqparat agenttiginen tolyqtaı oqı alasyz.
