Urlyqtan ınternet-alaıaqtyqqa deıin: ІІM alqa otyrysynda qaýipsizdik máseleleri talqylandy

ASTANA. KAZINFORM – Іshki ister mınıstrliginde ortalyq apparat qyzmetteriniń, polıtsııanyń aýmaqtyq bólinisteriniń, qylmystyq-atqarý júıesiniń, vedomstvolyq oqý oryndarynyń basshylary, sondaı-aq Ulttyq ulannyń óńirlik qolbasshylyqtarynyń komandırleriniń qatysýymen keńeıtilgen alqa otyrysy ótti, dep habarlaıdy Polisia.kz.

Otyrysta aǵymdaǵy jyldyń toǵyz aıyndaǵy jedel qyzmet qorytyndysy shyǵarylyp, aldaǵy kezeńge arnalǵan basym baǵyttar aıqyndaldy. Aıta ketý kerek, Memleket basshysynyń tapsyrmasy boıynsha mınıstrlik qoǵamda «Zań men tártip» jáne kez kelgen quqyqbuzýshylyqqa «nóldik tózimdilik» qaǵıdattaryn nyǵaıtýdy jalǵastyryp keledi.

Vedomstvo júzege asyryp jatqan keshendi sharalar óz nátıjesin berýde: jyl basynan beri qylmys sany 6 myńǵa nemese 7%-ǵa azaıǵan, sonyń ishinde adam óltirý, densaýlyqqa aýyr zııan keltirý, tonaý, qaraqshylyq, buzaqylyq jáne urlyq sııaqty qylmystardyń sany tómendegen. Qoǵamdyq oryndarda jáne kóshelerde jasalatyn quqyqbuzýshylyqtar da azaıdy.

– Eń bastysy – azamattardyń qaýipsizdigi. Jeke tulǵaǵa qarsy qylmystardyń azaıýy – bul qaıǵyly jaǵdaılardyń aldyn alý jáne adamdardyń qorǵalý deńgeıiniń artýy, – dedi Іshki ister mınıstri Erjan Sadenov.

Sonymen qatar alqa otyrysynda mınıstr jumys barysynda oryn alyp otyrǵan kemshilikterge toqtalyp, kúsheıtilgen baqylaýdy jáne tásilderdi qaıta qaraýdy talap etetin máselelerge nazar aýdardy.

Jol qaýipsizdigi erekshe baqylaýda tur. Toǵyz aıdyń ishinde respýblıka boıynsha 26 myńnan astam jol-kólik oqıǵasy tirkelgen. Qabyldanǵan sharalardyń nátıjesinde jol apattarynan qaza tapqandar sany azaıǵan. Mınıstr bul kórsetkishtiń azdap tómendegenine qaramastan árbir sannyń artynda adam ómiri turǵanyn atap ótti. Osyǵan baılanysty ol trassalarda patrýldeýdi kúsheıtýdi, patrýldik jasaqtardyń sanyn arttyrýdy, patrýldeý baǵyttaryn qaıta qaraýdy jáne jol qozǵalysyn baqylaýǵa arnalǵan tsıfrlyq sheshimderdi belsendi engizýdi tapsyrdy.

Uıymdasqan qylmysqa qarsy is-qımyl máseleleri qaraldy. Eseptik kezeńde uıymdasqan qylmystyq topty qurý jáne oǵan basshylyq etý faktileri boıynsha 70 qylmystyq is qozǵaldy, onyń ishinde 13-i transulttyq toptarǵa qatysty. Jalpy 248 qatysýshy qylmystyq jaýapkershilikke tartylýda. Mınıstr tabıǵı jáne bıoresýrstardy zańsyz óndirýge baılanysty qylmystyq shemalardy áshkereleý jumysyn kúsheıtýdi tapsyrdy, sondaı-aq halyqaralyq kólik baǵyttarynda júktiń saqtalýyn qamtamasyz etýge baǵyttalǵan keshendi sharalar qabyldaýdy júktedi.

Vedomstvo basshysy mal urlyǵyna qarsy kúreske erekshe nazar aýdardy. Ol aýyldyq jerlerde mal halyqtyń negizgi tabys kózi ekenin atap ótip, bul baǵytta profılaktıkalyq sharalardy kúsheıtý mindetin qoıdy.

Otbasylyq-turmystyq zorlyq-zombylyqpen kúres máselesi jeke qaraldy. Sońǵy jyldary mundaı quqyqbuzýshylyqtardyń aldyn alý tásili túbegeıli qaıta qaralyp, zorlyq-zombylyqty erte kezeńde anyqtap, onyń boldyrmaýǵa basymdyq berildi, densaýlyqqa jeńil zııan keltirý men uryp-soǵý úshin qylmystyq jaýapkershilik engizildi, sondaı-aq turmystyq zorlyq-zombylyqqa qarsy is-qımyl jónindegi mamandandyrylǵan bólimshe quryldy.

Eseptik kezeńde 70 myńnan astam qorǵaý uıǵarymy shyǵarylyp, quqyqbuzýshylarǵa 16 myńnan astam minez-qulyqqa qoıylatyn erekshe talaptar belgilendi. Daǵdarys ortalyqtaryna 6,5 myń áıel men bala jiberildi. Mınıstr keıbir óńirlerde áreket etý baıaý júrip jatqanyn atap ótip, ýchaskelik polıtsııa qyzmetiniń jumysyn baqylaýǵa alyp, qorǵaý uıǵarymdarynyń oryndalýyn qatań qadaǵalaýdy tapsyrdy.

Jasóspirimder qylmysy da nazardan tys qalǵan joq. Jyl basynan beri 1600-ge jýyq osyndaı fakti tirkelgen, onyń negizgi sebebi – ata-ana tarapynan baqylaýdyń álsizdigi. Túngi ýaqytta balalardyń eresekterdiń qaraýynsyz júrýine baılanysty 107 myńnan astam ata-ana, al kámeletke tolmaǵandardy tyıym salynǵan ýaqytta mekemege kirgizgeni úshin 1900-ge jýyq nysan ıesi jaýapkershilikke tartyldy.

Erjan Sadenov táýekel tobyna jatatyn otbasylarda profılaktıkalyq jumysty ákimdiktermen birlesip kúsheıtýdi, jasóspirimderdi qoǵamdyq kómekshiler qatarynda belsendi túrde tartýdy, mekteptermen jáne pedagogtarmen tyǵyz yntymaqtastyq ornatýdy, sondaı-aq balalardyń quqyqtyq sanasyn qalyptastyrý boıynsha túsindirý jumystaryn júrgizýdi tapsyrdy.

Mınıstr Májiliste «Quqyqbuzýshylyqtardyń profılaktıkasy týraly» jańa zań jobasy birinshi oqylymda qabyldanǵanyn eske saldy. Bul zań jobasy quqyqbuzýshylyqtardyń aldyn alýǵa barlyq memlekettik organdardy, úkimettik emes uıymdardy, kásipkerler men azamattardy tartýdy kózdeıdi. Zańda úılestirý, baqylaý jáne quqyqbuzýshylyqtardyń aldyn alý úshin jaýapkershilik tetikteri naqty aıqyndalǵan. ІІM basshysy jańa zań normalaryn iske asyrýǵa aldyn ala daıyndyqty bastap, qazirden túsindirý jumystaryn júrgizýdi tapsyrdy.

Jeke quram arasynda tártip pen zańdylyqty qamtamasyz etý máselesine de den qoıyldy. Vedomstvo basshysy barlyq qıyndyqtar men táýekelderge qaramastan, qyzmetkerlerdiń basym bóligi kúndelikti óz boryshtaryn adal atqaryp júrgenin atap ótti.

– Kún saıyn myńdaǵan qyzmetkerimiz naǵyz erlik jasap, abyroımen qyzmet atqaryp, halyqty qorǵaýda. Biraq keıbir jeke tártip buzýshylyqtar osy eńbektiń bárin joqqa shyǵaryp jiberedi. Bul bizge abyroı ákelmeıdi, – dedi mınıstr.

Osyǵan baılanysty aýmaqtyq bólinis basshylaryna qyzmet ornyna oralǵan boıda jeke quram arasynda tártipti nyǵaıtý jumystaryn júrgizý tapsyryldy: ár qyzmetkermen jeke aldyn alý jumystaryn, jas mamandarǵa tálimgerlikti kúsheıtý, ashyq sot otyrystary men ofıtserlik jıyndar tájirıbesin keńinen qoldaný mindetteldi.

Mınıstr qyzmettik tártipti buzýǵa beıim adamdarǵa erekshe baqylaý ornatýdy, al túzelýge qabiletsiz qyzmetkerlerge qatysty tıisti kadrlyq sharalar qabyldaýdy talap etti.

Sondaı-aq jedel qyzmettiń birqatar mańyzdy baǵyttaryna, sonyń ishinde esirtki qylmysyna qarsy kúres, ınternet-alaıaqtyqtyń aldyn alý, kóshi-qon baqylaýy jáne basqa da máselelerge nazar aýdaryldy. Mınıstr nashaqorlyqpen kúres jónindegi keshendi jospardy ázirleýdi jedeldetýdi, ınternet-alaıaqtyqqa qarsy áreket etýden aldyn alý sharalaryna kóshýdi, halyqty ózin qorǵaý tásilderi týraly aqparattandyrýdy kúsheıtýdi, sheteldik jumys kúshin zańsyz tartý faktileriniń jolyn kesýdi, ár aýdandyq bólimde jedel basqarý ortalyqtaryn qurý jumystaryn aıaqtaýdy, qylmystardy ashý sapasyn arttyrýdy qamtamasyz etýdi tapsyrdy.

Jıyn sońynda Іshki ister mınıstri Erjan Sadenov qol jetkizilgen nátıjeler jumystyń sapasyna qoıylatyn talapty tómendetýge sebep bolmaýy tıis ekenin atap ótti. Eń basty mindet – qaýipsizdikti qamtamasyz etý jáne azamattardyń polıtsııaǵa degen senimin arttyrý.

Aıta keteıik, stalkıng boıynsha 2 qylmystyq is qozǵaldy.