Ýran jetkizý geografııasy keńeıtiledi - Qazatomónerkásip

ASTANA. QazAqparat - Qazatomónerkásip ýran jetkizý geografııasyn keńeıtpek. Bul týraly búgin Ortalyq kommýnıkatsııalar qyzmetindegi brıfıngte «Qazatomónerkásip» UAK» AQ-nyń basqarma tóraǵasy Ǵalymjan Pirmatov aıtty, dep habarlaıdy QazAqparat.

«Qazatomónerkásip marketıng qyzmetin nyǵaıtý jolynda qosymsha tabys pen jetkizý geografııasyn keńeıtý úshin belsendi qyzmet atqaryp keledi. Osy maqsatpen 2017 jyldyń maýsym aıynda Shveıtsarııada «Kazakatom AG» treıdıng kompanııasy quryldy», - dedi ol.

Onyń aıtýynsha, seriktestermen qarym-qatynas ta belsendi júrgizilýde. Qytaılyq «CGNPC» kompanııasymen birge Úlbi metallýrgııalyq zaýytynyń bazasynda jylý bólgish quramalar shyǵaratyn zaýyt salynyp jatyr. Kanadalyq «Cameco» korporatsııasymen «Inkaı» Qazaqstan-Kanada birlesken kásipornyndaǵy Qazatomónerkásip úlesin 40-tan 60 paıyzǵa deıin jetkizý jóninde kelisimge qol qoıyldy.

«Memleket basshysynyń «Qazaqstannyń úshinshi jańǵyrýy: jahandyq básekege qabilettilik» atty Joldaýyndaǵy tapsyrmalaryn oryndaý maqsatynda avtomattandyrý, tsıfrlandyrý jáne robottandyrý boıynsha birqatar jobalar iske asyrylyp keledi. Máselen, «Qazatomónerkásip-SaUran» kásiporny daıyn ónimdi ydysqa salýdyń robottandyrylǵan jelisin iske qosty. Ol adamı faktordy boldyrmastan óndiristegi keshendi qaýipsizdikti qamtamasyz etýge jáne derekterdi jınaý jáne taldaý júıesin avtomanttandyrýǵa múmkindik beredi», - dedi kompanııa basshysy.

Sonymen qatar ol sońǵy bes jylda kompanııa kásiporyndarynda óndiristik jaraqat alý deńgeıi eki esege qysqarǵanyn atap ótti.

«Aǵymdaǵy jyldyń 9 aıynda qorshaǵan ortany qorǵaý is-sharalaryna 1,2 mlrd teńgeden astam qarajat jumsaldy. 2017 jyly 530 ónertabystyq usynys engizildi. Boljam boıynsha olardyń ekonomıkalyq tıimdiligi 1,5 mlrd teńgeden asady», - dedi Ǵalymjan Pirimbetov.