Ýnıversıtet oqytýshylaryn áleýmettik qoldaý paketi boıynsha zańǵa ózgerister engiziledi

ASTANA. QazAqparat – Ýnıversıtetter ishinen shyqqan talantty, kóshbasshylyq qasıetteri bar menedjerler rezervin qurý júrgiziledi. Bul týraly Úkimet otyrysynda elimizdegi bilim berýdi damytýdyń 2026 jylǵa deıingi tujyrymdamasyn talqylaý kezinde QR Ǵylym jáne joǵary bilim mınıstri Saıasat Nurbek aıtty, dep habarlaıdy QazAqparat tilshisi.

Ýnıversıtetterdiń basqarý júıesin jetildirý máselesine toqtalǵan mınıstr: «bul baǵyt aıasynda Rektorlar keńesiniń jumysyn jańa turǵydan jandandyrýdy bastadyq. Menedjerlerdiń (rektorlyq korpýstyń) jańa býynyn qalyptastyrýdy sıngapýrlyq talant-menedjment (talent management) úlgisinde júzege asyrý josparlanǵan», - dedi S. Nurbek.

Onyń aıtýynsha, jumys berýshilerdi, bıznes-qurylymdar, kásiptik jáne qoǵamdyq birlestikterdi, óńirlik ákimdikter ókilderin korporatıvtik basqarýǵa keńinen tartý jumysy da jalǵasyn tabady.

«Biz joǵary bilim salasyndaǵy top-menedjerlerdiń biliktiligin únemi arttyrý maqsatynda forsaıt-sessııalardy, kýrstardy bastamaqpyz. Ýnıversıtetter ishinen shyqqan talantty, kóshbasshylyq qasıetteri bar menedjerler rezervin qurý jumysyn da júrgizip jatyrmyz», - dedi mınıstr.

Onyń sózine qaraǵanda, ınvestorlardy tartý jáne basqarý júıesin damytý úshin halyqaralyq tájirıbeni eskere otyryp, «Nysanaly kapıtal qorlary týraly» zań jobasynyń tujyrymdamasy pysyqtalyp jatyr. Sondaı-aq «Pedagog mártebesi týraly» Zańyna ýnıversıtetterdiń professorlyq-oqytýshy quramy men ǵalymdaryn áleýmettik qoldaý paketi boıynsha ózgerister engiziletin bolady.