Ýnıversıadada birneshe qashyqtyqta júlde alýdan úmittimiz - Nurbergen Jumaǵazıev
Bul týraly Qazaqstan ulttyq quramasynyń múshesi Nurbergen Jumaǵazıev málim etti, dep habarlaıdy «QazAqparat» HAA tilshisi.
Onyń aıtýynsha, ózi 500, 1000, 1500 metr qashyqtyqta baq synamaqshy. Sonymen qatar komandalas dostary Abzal Ájiǵalıev, Aıdar Bekjanov jáne Denıs Nıkıshamen birge 5 myń metr qashyqtyqta estafetalyq jarysta Qazaqstan qorjynyna medal salýǵa múmkindik bar. Degenmen qarsylastar da osal emes. Ýnıversıadada Koreıa, Reseı, Kanada, Gollandııa sııaqty elder myqty shorttrekshilerin báıgege qospaqshy.
«Ýnıversıadadan keıin birden Mınsk qalasyna, álem kýbogy kezeńine attanamyz. Jekeleı syn óz aldyna, estafetadan álem chempıonatyna qatysý úshin álem kýbogy kezeńderiniń qorytyndysy boıynsha úzdik segiz komandanyń qataryna iligý kerek. Men ózim short-trekpen on tórt jyldan beri aınalysyp kelemin. Oralda jabyq muz aıdyny saraıy ashylǵannan keıin-aq osy sport túrine kóńil bólinip, Qazaqstannyń eńbek sińirgen jattyqtyrýshysy Mádiǵalı Qarsybekov bizdi jalyqpaı baptaı bastady. Biz tabysqa jetsek, aldymen osy kisiniń arqasy dep bilemin», dedi «QazAqparat» tilshisine Nurbergen Jumaǵazıev.
Eske sala keteıik, ótken jyl qazaqstandyq shorttrekshiler úshin jemisti boldy. AQSh-tyń Solt-Leık-Sıtı qalasynda ótken álem kýbogy kezeńinde Abzal Ájiǵalıev 500 metr qashyqtyqta aldyna jan salmaı, qazaqstandyq shorttrekshiler arasynda tuńǵysh ret altyn júldeni ıelendi. Odan keıin Ońtústik Koreıanyń Kannyn qalasynda Nurbergen Jumaǵazıev 1 myń metr qashyqtyqta chempıon atandy. Jalpy, Jumaǵazıevterdi sportshylar otbasy deýge bolady. 1990 jylǵy Nurbergen qazir naǵyz der shaǵynda. Sondaı-aq onyń qaryndasy, 1999 jylǵy Ǵalııa bolashaǵynan úlken úmit kúttiredi. Short-trekpen aınalysatyn ol da Qazaqstan chempıonattary men respýblıkalyq dodalardan únemi oljamen oralyp júr.
Qysqy Ýnıversıadaǵa BQO-dan qatysatyn Abzal Ájiǵalıev, Aıdar Bekjanov, Nurbergen Jumaǵazıev jáne Norvegııanyń Lıllehammer qalasynda 2016 jyly jasóspirimder arasynda ótken ІІ qysqy olımpıada oıyndarynyń qola júldegeri Anıta Nagaı Oraldan erteń jolǵa shyqqaly otyr. 
