Ýnıversıada qonaqtarynyń qujaty Almaty áýejaıynda 1 mınýt ishinde resimdeletin bolady
Kelgen qonaq 1 mınýt ishinde qujat baqylaýynan elimizdiń shekarasyna óte alady, dedi 28-shi Búkilálemdik qysqy Ýnıversıadaǵa daıyndalý jáne ótkizý jónindegi dırektsııa dırektory Naıl Nurov BAQ-pen kezdesýde, dep habarlaıdy QazAqparat tilshisi.
«Ýnıversıadaǵa qonaqtardyń 90 paıyzy ushaqpen keledi. 2 823 sportshy men delegatsııa músheleri ushaqpen keledi. Eń úlken delegatsııa Reseı, Qytaı, AQSh-tan kelmek. Áýejaıda Ýnıversıada qonaqtary úshin birqatar qyzmet túrleri qosyldy. Ýnıversıada qonaqtaryn arnaıy kabınalarda resimdeıtin bolady. Shekara qyzmeti jedel ótkizý úshin taǵy 10 kabına qosady. Kelgen qonaq 1 mınýt ishinde qujat baqylaýynan elimizdiń shekarasyna óte alady», - dedi N.Nurov.
Sonymen qatar, ol neshe memlekettiń sportshylary elimizge vızasyz kire alatyn jetkizdi.
«Ýnıversıadaǵa qatysatyn 45 eldiń sportshylary men delagatsııa músheleri vızasyz elimizge kire alady. 8 eldiń ókili óz elinde vızalaryn alyp jatyr. 4 memleket ókilderiniń vızasy Almaty áýejaıynda beriledi. Naqtyraq aıtqanda, Madagaskar, Ýganda sekildi eldiń sportshylary Almaty áýejaıynda qujattaryn resimdeıdi», dedi Dırektsııa dırektory.
Naıl Nurovtyń aıtýynsha, qonaqtardy áýejaıdan Atletter qalashyǵyna tezirek jetkizý joldary qarastyrylǵan.
«Biz qonaqtarymyzdy Atletter qalashyǵyna jyldam jetkizý jaǵyn qarastyrdyq. Arnaıy júrgizgen synaq-testimizde 56 mınýtta áýejaıdan sol jerge barady. Barlyq qonaqtar mingen kólikterdi Almaty ІІD jol-patrýl qyzmeti alyp júredi», dedi N.Nurov.
Eske sala keteıik, 28-shi Búkilálemdik qysqy Ýnıversıada Almatyda 29 qańtar men 8 aqpan aralyǵynda ótedi. Alǵashqy qonaqtar 24 qańtar kúni Qytaıdan keledi.
