Ýnıversıada aıaqtala sala sportshylarymyzdy Qysqy Azııa oıyndary kútip tur

ASTANA. QazAqparat - Almaty tórinde ótetin Búkilálemdik ýnıversıada oıyndary aıaqtala salysymen kóp uzamaı Japonııanyń Sapporo qalasynda VIII qysqy Azııa oıyndarynyń alaýy jaǵylady, dep habarlaıdy QazAqparat tilshisi.  

Esterińizge sala keteıik, sońǵy VII Azııa oıyndary 2011 jyly qazaq eliniń Almaty jáne Astana qalalarynda ótken bolatyn. Onda jerlesterimiz 32 altyn, 21 kúmis, 17 qola medalmen tarıhı jeńisterine qol jetkizgen edi. Bul dodada japondar 13 altyn, 24 kúmis, 17 qola medalmen qazaq elinen keıingi 2-orynǵa taban tiredi. Al bıyl kúnshyǵys eliniń ókilderi óz elinde ótetin dúbirli synda esh aıanyp qalmasy anyq.

Tarıh paraqtaryna kóz júgirtsek, Japonııa qysqy Azııa oıyndarynyń otany sanalady. Bul japondyqtardyń qysqy Azııany uıymdastyrǵan tórtinshi oıyny bolmaq. Eń alǵash Qysqy Azııa oıyndary 1986 jyly osy elde ótken bolatyn. Ekinshi ret 1990 jyly da osy qalada uıymdastyryldy. Al úshinshi ret 2003 jyly Aomorı qalasynda ótkizdi.

Tórtinshi ret Sapporo qalasynda ótkeli otyrǵan VIII Azııa oıyndaryna 45 eldiń sportshylary qatysady dep kútilýde. Olar sporttyń 11 túri boıynsha baq synamaq. Azııa oıyndary aqpannyń 19-y men 26-sy kúnderi ótedi.