Ýnıversıada alaýyn kimder kóteredi
«Bul mańyzdy mindetti 1000 adam atqaratyn boldy. Myń alaýgerdiń 70%-yn ǵylym, mádenıet jáne sport salasynda jetistikterge jetken 17-28 jas aralyǵyndaǵy stýdentter qurap otyr», - delingen habarlamada.
Olardyń qatarynda grek-rım kúresiniń 1980 jylǵy olımpıada chempıony Jaqsylyq Úshkempirov, bokstan 2000 jylǵy olımpıada chempıony Ermahan Ybyraıymov, 1988 jylǵy Olımpıada oıyndarynyń kúmis júldegeri, Qazaqstan Respýblıkasynyń eńbek sińirgen bapkeri Dáýlet Turlyhanov, bokstan eki dúrkin álem chempıony Nazym Qyzaıbaı, júzýden 2016 jylǵy olımpıada chempıony Dmıtrıı Balandın, Ábý-Dabıde ótken djıý-djıtsýdan álem chempıony Móldir Mekenbaeva, sondaı-aq, túrli jyldary Qazaqstanǵa jeńister syılaǵan taǵy da basqa kóptegen sportshylar bar.
Buryn habarlaǵanymyzdaı, alaýgerlerdi irikteý úsh kezeńnen turdy.
Іrikteýdiń birinshi kezeńi 1 qyrkúıek kúni bastalyp, respýblıkamyzdyń barlyq joǵary oqý oryndaryn qamtydy. Ýnıversıtetter ishki baıqaý qorytyndysy boıynsha óz ótinimderin berdi. Ekinshi kezeńde irikteý barysyna oblystyq ortalyqtarda Estafetany ótkizýmen aınalysatyn aımaqtyq shtabtar qosyldy.
Іrikteýdiń úshinshi kezeńinde kez kelgen adam www.torchrelay.kz saıtynda ótinim toltyryp, Estafetaǵa alaýger retinde qatysýǵa ótinim jibere aldy.
2017 jyldyń 25 qańtarynda Astanada 28-shi Dúnıejúzilik qysqy ýnıversıada Alaýy tutanady. Bes kún aralyǵynda árbir oblys ortalyǵynda Alaýdy jaǵýǵa arnalǵan saltanatty shara ótkiziletin bolady. Alaý estafetasy óńirlerde ótkizilgennen keıin 16 alaýger Alaýdy Almatyǵa jetkizip, osynda Ýnıversıadanyń ashylý saltanatynda bir tostaǵanǵa biriktiredi. Stýdenttik oıyndardyń astanasynda alaýdy 100 adam kóterip ótedi.
Jalpy alǵanda Ýnıversıada alaýy 22 500 shaqyrym júrip ótedi. Onyń 200 shaqyrymyn alaýgerler jaıaý júrip ótpek. Stýdenttik oıyndardyń resmı áýetasymaldaýshysy «Eır Astana» kompanııasy alaýdy aımaqtardan Almatyǵa jetkizedi. Osylaısha Estafeta alaýy qalǵan 22 300 shaqyrymdy Almatyǵa deıingi jolda ótkizedi.
