Ýnıversıada-2017 uıymdastyrýshylary álemniń tanymal sportshylaryn shaqyrǵan joq

ALMATY. QazAqparat - Almatyda ótetin dúnıejúzilik qysqy Ýnıversıadaǵa álemdik sporttyń tanymal juldyzdary qatyspaıdy, dep habarlaıdy QazAqparat tilshisi «Ýnıversıada-2017» dırektsııasynyń dırektory Naıl Nýrovtyń sózine súıene otyryp.

«Árıne, biz Ýnıversıadada álemdik sporttyń sýper sportsmenderi men  sýper juldyzdaryn kútip otyrǵanymyz joq. Bul  Ýnıversıada, stýdentter oıyny. Ekinshi jaǵynan Ýnıversıada jańa juldyzdardyń esimin áıgileıtin bolady. Jerlesterimiz, ýnıversıada qonaqtary sporttyń bolashaq juldyzdaryn kórýine múmkindik týady. Birshama ýaqyt ótkennen keıin: «Men myna juldyzdy osydan 2-3 jyl buryn Almatyda kórgenmin» dep aıtatyndar bolady», - dedi Naıl Nýrov.

Sonymen qatar, ol qazaqstandyq sportshylar ýnıversıada oıyndaryna belsendi daıyndalyp jatqanyn aıtty.

«Bizdiń seriktesterdiń kómegimen Ýnıversıada oıyndarynyń bıýdjetin 1 mlrd teńgege únemdeý múmkindigi týyp otyr. Oǵan deıin de 17 mlrd teńgeni únemdegenbiz. Endi oǵan 1 mlrd teńge jáne qosyldy», - dedi N.Nýrov.

Eske sala keteıik, Almatyda qysqy Ýnıversıada 28 qańtar men 8 aqpan aralyǵynda ótedi. Saıysqa 55 elden 2 myńǵa jýyq sportshy qatysady. Ýnıversıadada qatysýshylar 8 ǵımaratta 12 sport túrinen baq synaıdy. Barlyǵy 543 medal sarapqa salynady.  Ýnıversıadaǵa 3 myń erikti tartylyp otyr. Sharaǵa 30 myńǵa jýyq qazaqstandyq jáne sheteldik týrıst keledi dep kútilip otyr.