Ýnıversıada-2017: Mánerlep syrǵanaýdan Qazaqstan quramasy anyqtaldy
Qazaqstannyń mánerlep syrǵanaý boıynsha quramasynyń bas bapkeri Quralaı Úzirova Almatydaǵy Dúnıejúzilik ýnıversıadaǵa qatysatyn quramanyń tizimin bekitti.
Erler komandasyna Denıs Ten, Abzal Raqymǵalıev jáne Artýr Panıhın kirgen bolsa, áıelder arasyndaǵy saıystarda Qazaqstan namysyn Aıza Imanbek, Veronıka Sheveleva jáne Jansaıa Ádihanova qorǵaıtyn bolady.
Sochı Olımpıadasynda qola júldeger atanǵan Denıs Ten Almatydaǵy Qysqy ýnıversıada kezinde erler arasyndaǵy jeke mánerlep syrǵanaý jarysynyń basty favorıtteriniń biri bolmaq. Alaıda áıelder komandasyna medal úshin kúres qıynǵa soqpaq.
«Áıelder komandasyna jas qyzdar kirip otyr olardyń barlyǵynyń oıynynda ózderine tán tartymdy tustary bar, alar bıikteri áli alda. Eń bastysy, olar el atynan barynsha joǵary deńgeıde óner kórsetse deımin. Aıza Imanbek alǵashqy ondyqtar tizimine kirgenin qalaımyn. Jaqsylap kúshin salyp, qobaljýyn basyp, óz bıin taza oryndap shyǵa alatyn bolsa, onyń qolynan bul keledi. Bizdiń áıelder quramasynyń oıyny barlyǵynyń kóńilinen shyǵady dep úmittenemiz», - dedi Quralaı Úzirova.
Jas mánerlep syrǵanaýshy Veronıka Sheveleva: «Ýnıversıadaǵa qatysatynymdy estigende óte qatty qýanyp kettim. Osyndaı deńgeıdegi jarysqa qatysý men úshin úlken qurmet. Óz kúshime senimmen qaraımyn. Biletinimniń bárin kórsete alamyn dep oılaımyn. Qazir múmkindiginshe kóbirek jattyǵýǵa tyrysyp júrmiz, kún saıyn 3-4 saǵat muzda jattyǵýdamyz», - dep atap ótti.
Esterińizge sala keteıik, Qysqy ýnıversıadanyń búkil tarıhynda qazaqstandyq mánerlep syrǵanaýshylar eki medal jeńip alǵan. 1995 jyly Ispanııanyń Hakasynda Marına Haltýrına jáne Andreı Krıýkov juptyq oıynda altyn jeńip alǵan bolsa, Dmıtrıı Kazarlyga jáne Elızaveta Stekolnıkova elimizge qola medaldardy syılady.
