Ýnıversıada-2017: Qazaqstandyq kerlıngshiler daıyndyqtyń qorytyndy kezeńine kiristi
Qazaqstannyń kerlıng boıynsha quramasy 2017 jyly Almaty qalasynda ótetin 28-shi Dúnıejúzilik qysqy ýnıversıadaǵa daıyndyǵyn jalǵastyrýda. Qazaqstandyq kerlıngshiler qarasha aıynda Ońtústik Koreıada oqý-jattyǵý jıyndaryn ótkizip, Tynyq muhıty-Azııa oıyndarynda óner kórsetip qaıtty. Qurama Qysqy ýnıversıadaǵa daıyndyǵynyń qorytyndy kezeńin Almatyda ótkizýde.
Qazaqstanda kerlıng óte qarqyndy damyp kele jatqan sport túrleriniń biri bolyp tabylady. 1998 jyldan bastap osy sport túri Olımpıada baǵdarlamasyna engizilgen bolatyn. Almatynyń Qysqy ýnıversıadany ótkizýge quqyq alýy elimizde kerlıngtiń damýyna taǵy bir serpin berip otyr. Qazaqstan Respýblıkasy Kerlıng qaýymdastyǵynyń bas hatshysy Vıktor Kımniń sózine qaraǵanda, Qysqy ýnıversıadaǵa bıik maqsattardy kózdegen jas komanda qatysaıyn dep otyr.
«Biz Qazaqstannyń toǵyz aımaǵyndaǵy sportshylardan ulttyq quramany jınadyq. Olardyń barlyǵy kerlıng dese, ishken asyn jerge qoıatyn, osy sport túrimen shuǵyldanǵysy keletin qyz-jigitter. Komandamyzda qazir 20 adam bar, barlyǵy óner kórsetýge saqadaı saı otyr. Alaıda olardyń kerlıngpen aınalysyp júrgenine bar-joǵy 1-2 jyl ǵana bolǵanyn eskerý qajet. Al Ýnıversıada kezinde álemdik deńgeıdegi komandalar qashanda kúshti qurammen qatysady, bul ózi solaı tarıhı turǵyda qalyptasyp ketken. Ýnıversıada - mańyzdylyǵy jaǵynan Olımpıada oıyndarynan keıin ekinshi orynda turǵan jarys. Oǵan Reseı, Shveıtsarııa, Chehııa, Germanııa, Shvetsııa, Kanada, Ońtústik Koreıa, Japonııa sekildi elderden álemniń myqty komandalary qatysady. Árıne, olarmen básekege túsý qıyn bolmaq, alaıda biz búkil kúshimizdi salyp kúrespekpiz», - dep atap ótti Vıktor Kım.
Ýnıversıada-2017 aıasynda kerlıngten jarystar «Almaty-Arena» kesheniniń tegis muz tóselgen stadıonynda ótedi.
