Ýnıversıada - 2017: Kásipqoı fıtnes-trener Almaty turǵyndaryna qoǵamdyq sporttyq jattyǵý jumystaryn júrgizedi
Naýryz - maýsym aılarynyń ár senbisinde QR tuńǵysh Prezıdenti saıabaǵynda Qazaqstannyń kásipqoı fıtnes-treneri Baýyrjan Káripovtyń basshylyǵymen jalpyhalyqtyq tegin sporttyq jattyǵý jumystary ótkiziledi.
«Almatyda buqaralyq sport jaqsy damýda. Qoǵamdyq jattyǵýlar qala turǵyndaryn biriktirip, olardyń densaýlyqtaryn nyǵaıta túsedi. Dırektsııanyń bastamasymen uıymdastyrylyp jatqan bul sharalar ońtústik astana turǵyndaryna óz paıdasyn tıgizip, sporttyń damýyna úlesin tıgizedi dep úmittenemiz. Jalpy, Ýnıversıadany Almaty qalasynda ótkizý sport pen sporttyq ınfraqurylymnyń damýyna jańa bir kúsh beredi», - dedi alǵash ret jattyǵý jumystaryn júrgizgen trener Baýyrjan Káripov.
Baýyrjan Káripov - Qazaqstandaǵy ǵana emes, ol álemdik dárejedegi eń myqty bapkerlerdiń biri. Óz-ózin qorǵaý jáne toıtarys berý «Barys» mektebiniń, Almaty qalasyndaǵy Mýaı-Taı men kıkboksıng mektepteriniń negizin salýshy. AQSh-tyń eń tanymal sport klýbtarynda qyzmet atqarǵan. «Juldyzdy trener» (trener áıgili kınojuldyzdar, reseı men amerıkalyq estrada juldyzdaryn sportqa baýlyǵan) tıtýlynyń ıegeri. Baýyrjan Káripov kóptegen sporttyq jarystarda júldeli bolǵan. Ol karate, kık-bokstyń túrli jarystaryna jáne Amerıka Chempıonatynda trıatlonǵa qatysqan.
Atalmysh qoǵamdyq jattyǵý jumystaryna kez-kelgen adam qatysa alady. Ol úsh aı boıy ár senbide, tańǵy saǵat 10-da Respýblıkanyń Tuńǵysh Prezıdenti saıabaǵynda ótkiziledi.
Ýnıversıada-2017 dırektsııasy «Dostyk Crossfit» sport klýbymen birigip naýryz-maýsym aralyǵynda taýǵa jaıaý kóterilý uıymdastyrdy. Kez-kelgen adam qatysa alady. Taýǵa shyǵatyn toptyń jınalýy árbir jeksenbide tańǵy saǵat 10-da «Shymbulaq» kýrortynyń avtoturaǵynda ótkiziledi.
Eske sala ketsek, bıylǵy jyly ımıdjdik sporttyq sharalarǵa bólinetin qarjynyń qysqartylýy nátıjesinde Almaty qalasyndaǵy buqaralyq sport shyǵyndary 20 ese artty.
