Ýnıversıada-2017-ge álemniń 59 elinen 2 myńnan astam sportshy qatysady

ASTANA. QazAqparat - Ýnıversıada-2017 halyqaralyq sport básekesine álemniń 59 elinen 2 myńnan astam sportshy qatysady. Bul týraly búgin Úkimettiń selektorlyq rejimdegi otyrysynda QR Mádenıet jáne sport mınıstri Arystanbek Muhamedıuly málim etti, dep habarlaıdy QazAqparat.

«Stýdentter arasyndaǵy álemniń eń aýqymdy sporttyq is-sharasyn óz elimizde qabyldaýǵa 12 kún qaldy. Atalǵan jarys medaldaryna ıe bolý - ár stýdenttiń basty armany, memlekettiń saıası jáne ekonomıkalyq jaǵynan myqty ári qarqyndy damýynyń belgisi. Stýdenttik qurama komandanyń aldaǵy oıyndarǵa sapaly daıyndyǵyn qamtamasyz etý mınıstrlik jumysynyń basty baǵyty sanalady», - dep atap ótti Almatyda ótetin stýdentter arasyndaǵy qysqy Ýnıversıada oıyndaryna daıyndyq barysy týraly baıandaǵan mınıstr.

Onyń aıtýynsha, Ýnıversıadaǵa álemniń 59 elinen 2 myńnan astam sportshy qatysady dep josparlanýda. Jarystar barysynda sporttyń 12 túri boıynsha 86 medal jıyntyǵy sarapqa salynady. Bul rette medaldar jıyntyǵynyń eń kóbi konkı jarysynda (14 jıyntyq), shańǵy jarysynda (11) jáne short-trekte (8) tigiledi.

«QR sportshylarynyń sapaly daıyndyǵyn úlestirý maqsatynda jáne sport túrleri boıynsha jarystardy uıymdastyrý jáne ótizýdi baqylaý úshin Respýblıkalyq shtab quryldy. Búgingi kúni shtab Almaty qalasynda qarqyndy jumys isteýde», - dedi Muhamedıuly.