Ýnıversıada-2017 eriktilerin irikteý aıaqtaldy
Birinshi kezeńi Almatyda 27 qyrkúıekte bastaldy. Ótinimder jazbasha saýalnama túrinde, sondaı-aq, Ýnıversıada saıtynda onlaın arqyly qabyldandy. Barlyǵy 14 165 ótinim jiberilip, kóbisi almatylyqtardan (Almaty qalasyndaǵy oqyp júrgen stýdentter - 9 303) kelip tústi. Sondaı-aq, Ýnıversıada-2017 eriktisi atanǵysy keletin sheteldikterdiń ishinde reseılikter basym boldy. Olardan barlyǵy 3594 ótinim keldi. Ótinimder Qazaqstan óńirlerinen, sonymen birge, Italııa, Kanada, AQSh, Qytaı, Lıvan, Ulybrıtanııa, Gonkong, Ýkraına, Moldavııa, Ózbekstan sekildi alys jáne taıaý shetelden de kelip túsken ótinishter bar.
Ýnıversıada-2017 eriktileriniń negizgi quramy aǵylshyn tilin jaqsy meńgergen, kóshbasshylyq jáne uıymdastyrý qabiletteri joǵary jasy 18-ge deıingi jáne 80 jastan aspaǵan tulǵalar bolýy tıis. Ýnıversıada kezinde jumys jasaý úshin barlyǵy 3000 erikti tańdap alyndy. Nıet bildirgen tulǵalarmen betpe-bet jáne skype arqyly suhbattasýlar ótkizildi. Alys jáne taıaý shetelden qatysatyn eriktiler sany 200-den asatyndyǵy belgili.
Qazirgi tańda eriktilerdi úılestirýmen aınalysatyn, tıisti oqytýdan trenıngter, dárister men sport nysandarynda kvestterden ótken 150 adam tańdap alyndy. Eriktilerdiń bir bóligi 2017 jyly Almaty qalasynda ótetin 28-shi Dúnıejúzilik qysqy Ýnıversıadaǵa daıyndalý jáne ótkizýge arnalǵan is-sharalarǵa, atap aıtqanda, delegatsııa basshylarynyń jumys kezdesýi, Ýnıversıada-2017 nysandaryndaǵy san alýan sport is-sharalary, Ýnıversıada-2017 oıyndaryna deıingi 100 kúndi toılaý sekildi taǵy da basqa is-sharalarǵa qatysýda. Eriktilermen jumys júrgizýdiń kelesi kezeńinde kelisimderge qol qoıylyp, olarǵa qajetti kıim-keshek beriletin bolady. Jumys kezinde eriktiler tamaqpen, tegin jolaqymen jáne uıaly baılanyspen qamtamasyz etiledi.
Ýnıversıada kezinde eriktiler 30-dan asa qyzmet baǵytynda jumys jasaıtyn bolady. Olardyń kópshiligi sport jarystaryndaǵy jumystarǵa tartylyp, sondaı-aq, kirip-shyǵýdy baqylaý qyzmeti, kólik, baspasóz qyzmeti, medıtsına, Atletter aýyly, kórermendermen jumys júrgizý, mádenı is-sharalar, qonaqtardy jaıǵastyrý, akkredıtteý, qaýipsizdik, bas aqparattyq ortalyq jáne basqa da jumystarǵa tartylady.
