UnitedHealthcare bas dırektoryn óltirgen kúdikti terrorıst retinde sottalady
ASTANA. KAZINFORM - 26 jastaǵy Lýıdjı Mandjonege UnitedHealth Group basshysy Braıan Tompsonnyń ólimine qatysty «terakt jasady» degen aıyp taǵyldy, dep jazady Euronews.
Braıan Tompson 4 jeltoqsanda Manhettende atyp óltirildi. Taǵylǵan 11 aıypta lańkestik maqsatta qasaqana kisi óltirý, jazany jeńildetetin jaǵdaıda óltirý, zańsyz qarý saqtaý, jalǵan qujat jasaý jáne t.b. bar. Sot jas jigitti barlyq bap boıynsha kináli dep tapsa, ol shartty túrde merziminen buryn bas bostandyǵynan aıyrylýy múmkin.
Bılik Qurama Shtattardaǵy eń iri medıtsınalyq saqtandyrý kompanııasynyń basshysy Tompsondy óltirý muqııat josparlanǵanyn aıtady. Ony qamaýǵa alý kezinde (Pensılvanııadaǵy McDonald's dúkeninde ustaldy) kúdiktiden qoldan jasalǵan qarý men jalǵan qujattar ǵana emes, sonymen birge odan «korporatıvtik Amerıkaǵa dushpandyq» bildirgen qoljazba manıfesi de tabyldy.
– Bul úreı týdyrý, jurt nazaryn aýdarý jáne qorqytýdy kózdegen qorqynyshty, jaqsy josparlanǵan, maqsatty kisi óltirý boldy. Bul bizdiń qalamyzdyń adam eń kóp shoǵyrlanǵan aýdandarynyń birinde bolyp, jergilikti turǵyndar men týrıster, jolaýshylar men kásipkerlerdiń qaýipsizdigine qaýip tóndirdi, - deıdi Manhetten okrýginiń prokýrory Elvın Bregg.
Tergeý Mandjoneniń áreketin onyń densaýlyq saqtaý salasyna kóńili tolmaýymen baılanystyrady. Olardyń aıtýynsha, 2023 jyldyń ortasynda Mandjone omyrtqasyna buranda ornatý arqyly operatsııa jasaýdy qajet etetin arqa jaraqatyn alǵan.
Mandjone qazir Pensılvanııa túrmesinde kepilsiz qamaýda otyr. Manhetten prokýrory qoǵamnyń Mandjonege degen oń kózqarasyn synǵa aldy. Shynynda da, ol óziniń «batyldyǵy», «júıemen kúresýi» jáne «tartymdylyǵy» úshin kópshiliktiń qoldaýyna ıe bolyp, áleýmettik jelilerde tanymal boldy.