United Cup týrnıri: Qazaqstan Grekııa quramasyn mıkste de tize búktirdi
ASTANA. KAZINFORM - Aýstralııanyń Pert qalasynda tennısten United Cup týrnırinde Qazaqstan men Grekııa quramalary arasynda sońǵy oıyn boldy.
Bul báseke matchtyń jalpy nátıjesine áser etpeıtin edi. Óıtkeni Aleksandr Shevchenko men Elena Rybakına jekeleı syndaǵy óz kezdesýlerin jeńispen aıaqtap, Qazaqstan komandasy merziminen buryn shırek fınalǵa joldama alǵan edi.
Aralas juptyq synda Qazaqstannan Jibek Qulambaeva – Aleksandr Nedovesov, Grekııadan Despına Papamıhaıl – Petros Tsıtsıpas kortqa shyqty.
Birinshi partııada grekııalyq jup basymdylyq tanytty – 6:2.
Ekinshisinde qazaqstandyq dýet ese qaıyrdy – 6:3. Sodan keıin sýper taı-breıkte jeńisti julyp aldy – 10:6.
Osylaısha, Qazaqstan Grekııany 3:0 esebimen utty.
Qazaqstannyń shırek fınaldaǵy qarsylasy keıin anyqtalady.
Eske sala keteıik, budan buryn tennısten United Cup týrnırinde Aleksandr Shevchenkonyń álemniń 11-raketkasyn jeńgenin jazǵan bolatynbyz.
Sondaı-aq tennısten United Cup týrnırinde Elena Rybakına bastaǵan Qazaqstan quramasy pleı-off kezeńine shyqty.