UNICEF alańynda 16 jas býllıngti qalaı jeńgenin áńgimelep berdi
Qazaqstan astanasynda public talk formatynda uıymdastyrylǵan UNICEF Talks jastar konferentsııasy ótti. Jastarǵa arnalǵan jáne jastar úshin ótkiziletin jyl saıynǵy is-sharanyń urany «Jastar Üni» boldy. Maqsat — balalar men jastarǵa olar óz múddesi men quqyqtaryna qatysty búkil másele boıynsha erkin pikir bildire alatyn ashyq alań usyný, dep habarlaıdy QazAqparat.
«UNICEF-te biz jastar únine senemiz jáne bul úndi barshaǵa jetkizýge umtylamyz. UNICEF balalardyń búkil quqyqtarynyń saqtalýyn qamtamasyz etý úshin Qazaqstanda otyz jylǵa jýyq jumys istep keledi. Bilim alý, densaýlyq saqtaý, súıispenshilikke toly otbasynda ómir súrý sııaqty bárimizge tanys quqyqtardyń ishinde kópshilik bile bermeıtin quqyq bar, ol — balalardyń ózderine qatysty barlyq másele boıynsha kózqarasyn erkin bildirý quqyǵy. Osynda, UNICEF Talks alańynda — bul quqyq shyndyqqa aınalady», — deıdi UNICEF Qazaqstan Respýblıkasyndaǵy ókiliniń m. a. Letısııa Bazzı-Veıl.
UNICEF-tiń Qazaqstandaǵy ulttyq izgi nıet elshileri — Ninety One toby osy is-sharanyń hedlaıneri boldy. Olar ózderiniń jeke basynan ótken oqıǵalardy jáne býllıng problemasymen kúresý tájirıbesin bólisip, bul qıynshylyqty qalaı jeńýge bolatynyn aıtty.
«Biz býllıngke kezigý jáne oǵan qarsy turý qanshalyqty aýyr jáne kúızelisti ekenin óz tájirıbemizden bilemiz. Jas kezde qýdalaýmen esh qoldaýsyz kúresý óte qıyn bolýy múmkin. Sondyqtan UNICEF Talks-qa qatysý jáne jas spıkerlerge qoldaý kórsetý biz úshin mańyzdy boldy. Kóbi kópshilik aldyna alǵash ret shyǵyp otyr jáne óz tájirıbesin bólisýge jasqanǵan joq. Olardyń áńgimeleri men ómir tájirıbesi basqa jastarǵa osyndaı qıyndyqtardy jeńýde kómek bolatynyna senimdimin. Sonymen qatar Qazaqstandaǵy ár balanyń baqytty bolashaǵy men teń múmkindikteri qamtamasyz etilýi úshin jaǵdaıdy jaqsy jaqqa ózgerte alatyn úlkenderge jastar úni jetetine senemin», — dep atap ótti Ninety One tobynyń ánshisi Zaq.
Ninety One-men birge konferentsııada Qazaqstannyń túrli óńirlerindegi mektepter men ýnıversıtetterden kelgen 11-23 jas aralyǵyndaǵy on alty spıker sóz sóıledi.
Olardyń jigerlendiretin áńgimeleri men ózekti problemalardy jeńý tájirıbesi búkil qatysýshylar úshin qundy motıvatsııa kózine aınaldy.
Іs-sharaǵa 200-den asa qatysýshy jınaldy, olardyń arasynda ortalyq memlekettik organdardyń, dıplomatııalyq korpýs, medıa jáne jalpy jurtshylyq ókilderi boldy.
