UNI-Q Group medıaholdınginiń bas dırektory taǵaıyndaldy
ASTANA. KAZINFORM – UNI-Q Group medıaholdıngi 2025 jylǵy jumysyn qorytyndylady. Aktsıonerlerdiń jalpy jınalysy kompanııanyń jumysyna oń baǵa berip, medıaholdıngti nyǵaıtýǵa, halyqaralyq yntymaqtastyqty damytýǵa jáne jobalarynyń ınvestıtsııalyq tartymdylyǵyn arttyrýǵa baǵyttalǵan birqatar basqarýshylyq sheshim qabyldady.
Aktsıonerlerdiń sheshimimen Muhamedqalı Taýan bas dırektor bolyp taǵaıyndaldy. Onyń halyqaralyq yntymaqtastyq jáne korporatıvtik basqarý salasynda aýqymdy bastamalardy júzege asyrýda aıtarlyqtaı tájirıbesi bar. Buǵan deıin ol «Dara» prezıdenttik bastamalar qorynda, «Astana» halyqaralyq qarjy ortalyǵynda (AHQO), Ulttyq banktiń Ulttyq ınvestıtsııalyq korporatsııasynda jáne jeke qurylymdarda basshylyq qyzmetter atqarǵan. AHQO-da jumys istegen kezinde ol kreatıvtik ındýstrııany damytý máseleleri boıynsha zańnamalyq aktilerdi ázirleýge qatysqan.
Aktsıonerlerdiń jalpy jınalysy Muhamedqalı Taýannyń negizgi mindetteri qataryna halyqaralyq yntymaqtastyqty damytý, jańa ınvestorlardy tartý, sondaı-aq kreatıvtik ındýstrııa salasynda zańnama ázirleýge yqpal etý úshin ýákiletti memlekettik organdarmen júıeli túrde ózara is-qımyl jasaý jatqyzyldy.
Budan basqa, Muhamedqalı Taýanǵa «Dara» prezıdenttik bastamalar qorynda jumys istegen kezinde bastaǵan jobalaryn, atap aıtqanda, túrik-amerıkalyq Karga Seven Pictures kınostýdııasymen birlesip túsirilgen «Altyn ımperııa» derekti-dramalyq hıkaıasyn aıaqtaý mindeti júkteldi.
Muhamedqalı Taýannyń aldyna qoıylǵan maqsattardy eskere otyryp, Astanada top keńsesin ashý týraly sheshim qabyldandy, al medıaholdıngtiń shyǵarmashylyq jáne tehnıkalyq bólimderi Almatyda jumysyn jalǵastyrady. Dmıtrıı Gýdýmak holdıngtiń tehnıkalyq baǵyt pen bıznesti damytýǵa jaýapty teń bas dırektory, al Anara Júnisova – Unico Studio basshysy jáne Unico Play bas prodıýseri qyzmetin jalǵastyrady.
Uni-Q Group medıaholdıngi óz qyzmetin 2024 jyly bastady. Holdıngtiń alǵashqy ınvestorlarynyń biri qazaqstandyq kásipker Tımýr Týrlov boldy. Unico Studio-dan basqa, medıaholdıngtiń quramyna Unico Play onlaın kınoteatry, AI-dýblıaj jáne sýbtıtr stýdııasy Unico Dubbing, Unico Rights halyqaralyq dıstrıbýtsııa júıesi, qazaq tilindegi AINA onlaın óndiristik jáne oıyn-saýyq medıasy jáne jas shyǵarmashylarǵa arnalǵan Unico Play Lab keńistigi kiredi.
On jas rejısser bilim berý bastamalary aıasynda oqýdan ótip, alǵashqy qysqametrajdy fılmderin túsirip jatyr. 2025 jyldyń 12 qyrkúıeginde iske qosylǵannan beri Unico Play onlaın kınoteatry 500 myńnan astam biregeı kórermendi tartty, aı saıynǵy belsendi paıdalanýshylar sany (MAU) 1,3 mln-nan asty. 9 myń saǵattan astam kontent qazaq tilinde taratyldy. Zııatkerlik menshikti qorǵaý sharalarynyń bóligi retinde qaraqshylyq saıttardy buǵattaý jáne kontenttiń zańsyz taratylýyn shekteý boıynsha jumystar júrgizilip jatyr.
Medıaholdıngke mańyzdy tarıhı oqıǵalar men tulǵalarǵa arnalǵan kıno ónimderin, sondaı-aq balalar men kópshilikke arnalǵan qazaq tilindegi kontent túsirý mindeti júktelgen.
Osyǵan deıin Almaty oblysy jumyspen qamtýdy úılestirý basqarmasynyń basshysy aýysqany týraly jazdyq.