Úndistanda tabıǵat apatynan 35 adam qaza tapty
Osy aptada Úndistannyń ońtústigindegi Tamılnad shtatynda bolǵan sý tasqyny men nóser jańbyr saldarynan 35 adam mert boldy. Bul týraly senbi kúni jergilikti úkimet ókili málim etti. Kazinform bul týraly Sınhýa agenttigine silteme jasap habarlaıdy.
Qatty jaýyn-shashyn birneshe okrýgke jaýyp, oıpań jerlerdi sý basyp, avtokólik jáne temirjol qatynasyn buzdy.
Shtattyń bas hatshysy Shıv Das Mınanyń habarlaýynsha, jalpy 35 adamnyń qaza tapqany belgili bolǵan. Ol qazir zardap shekken aýdandardaǵy qutqarý operatsııasy aıaqtalǵanyn jáne negizgi qyzmetterdi qalpyna keltirýge basa nazar aýdarylyp jatqanyn atap ótti.
«175-ke jýyq eldi mekende avtojoldar zaqymdaldy, onyń 140-ynda qalpyna keltirý jumystary aıaqtaldy. Qalǵanynda jóndeý áli jalǵasyp jatyr. Basqa qyzmetter, máselen, sýmen qamtamasyz etý de qalpyna keltirilýde. Sý berý júıesi tolyq buzylǵan jerlerge sýdy tsısternamen jetkizýdi uıymdastyrdyq», - dedi sheneýnik.
50 myńǵa jýyq adam sý basqan jerlerden qaýipsiz oryndarǵa evakýatsııalandy. Sý tasqyny men nóser jańbyr 3,7 myń lashyq pen 170 turaqty úıge zaqym keltirdi. Sonymen qatar 183 myń ga aýmaqtaǵy egistikti sý basyp qaldy. Úkimettik toptar zalal shyǵynyn eseptep jatyr.
Tamılnadtaǵy tasqyn shtat aı basynda Chennaı men soǵan jaqyn úsh okrýgke tóngen «Mıchaýng» tsıklonynyń saldarynan aıyǵýǵa tyrysyp jatqanda jaǵdaıdy odan saıyn qıyndatyp jiberdi.
