Úndistan Pahalgamdaǵy teraktiden keıin Pákistanǵa qarsy sharalar jarııalady
ASTANA. KAZINFORM — Úndistannyń Qazaqstandaǵy elshiligi Pákistanmen týyndaǵan qaqtyǵysqa baılanysty eldiń resmı ustanymyn málimdedi.
Úndistan syrtqy ister mınıstriniń málimdemesine sáıkes, 2025 jylǵy 22 sáýirde Pahalgamda bolǵan lańkestik shabýylǵa jaýap retinde Qaýipsizdik jónindegi komıtet (CCS) birqatar sheshim qabyldady.
Komıtetke 25 úndistandyq jáne bir nepaldyq azamattyń qaza taýyp, odan bólek birneshe adamnyń jaraqat alǵany týraly tolyq aqparat berildi. CCS shabýyldy qatań aıyptap, qaza tapqandardyń otbasyna kóńil aıtty jáne jaralanǵan jandardyń tez saýyǵyp ketýin tiledi.
Úndistan úkimeti basqa memleketter tarapynan teraktige úzildi-kesildi qarsy shyǵyp, qoldaý men yntymaqtastyq bildirgen kóptegen úndeý alǵanyn málimdedi. CCS halyqaralyq qoldaýǵa rızashylyq bildirip, terrorızmge jahandyq tózbeýshilikti erekshe atap ótti.
Brıfıng barysynda shabýyldyń shekara asyp jasalǵan baılanystary týraly málimetter usynyldy. Bul shabýyl aımaqtaǵy sátti ótken saılaý men ekonomıkalyq ilgerileý aıasynda júzege asqany aıtyldy.
Lańkestik aktiniń mańyzdylyǵyn moıyndaı otyryp, CCS kelesi qarsy sharalardy qabyldady:
1960 jylǵy Ind sý kelisimin toqtatý.;
— Bul kelisim Pákistan transshekaralyq lańkestikke qoldaý kórsetýden naqty jáne qaıtymsyz túrde bas tartpaıynsha kúshin toqtatady, — delingen 23 sáýirdegi málimdemede.
Attarı baqylaý-ótkizý beketin jabý;
Pákistan azamattaryna SAARC vızalyq baǵdarlamasy (SVES) boıynsha shekteýler;
Pákistan azamattaryna SAARC vızalyq jeńildik baǵdarlamasy boıynsha Úndistanǵa kirýge tyıym salynady. Buǵan deıin berilgen barlyq SVES vızalary joıyldy dep esepteledi.
Pákistannyń Joǵarǵy komıssarıatyndaǵy áskerı keńesshilerdiń elden shyǵarylady;
Úndistan Pákistannyń Joǵarǵy komıssarıatyndaǵy qorǵanys, áskerı-teńiz jáne áskerı-áýe keńesshilerin «persona non grata» dep jarııalap, elden bir apta ishinde ketýge nusqaý berdi.
Sondaı-aq Úndistan Islamabadtaǵy Joǵarǵy komıssarıatynan keńesshilerin keri shaqyrdy. Eki eldegi komıssarıattarda atalǵan laýazymdar joıylady. Sonymen qatar, eki komıssarıattan 5 qyzmet kórsetý keńesshisi jumystan bosatylady.
Joǵarǵy komıssarıat qyzmetkerleriniń jalpy sany 55-ten 30-ǵa deıin qysqarady.
Qaýipsizdik jónindegi komıtet jalpy jaǵdaıdy taldap, barlyq kúsh qurylymyna joǵary daıyndyqta bolýdy tapsyrdy. Shabýylǵa qatysy bar barlyq tulǵa men olardyń demeýshileri jaýapqa tartylatyny habarlandy. Úndistan jaqynda ekstradıtsııalanǵan Tahavvýr Rana isin mysalǵa keltirip, lańkestik áreketter jasaǵan nemese oǵan qatysqan kez kelgen adamdy aıaýsyz jazalaıtynyn málimdedi.
Buǵan deıin BUU Qaýipsizdik Keńesiniń músheleri 2025 jylǵy 22 sáýirde Djammý jáne Kashmırde bolǵan lańkestik shabýyldy eń qatań aıyptady. Keńes músheleri qaza tapqandardyń otbasyna, sondaı-aq Úndistan men Nepal úkimetterine kóńil aıtyp, jaralanǵan jandarǵa tolyq jáne tez saýyǵyp ketýdi tiledi.
Juma kúni jarııalanǵan málimdemede Qaýipsizdik Keńesi terrorızmniń barlyq túri men kórinisi halyqaralyq beıbitshilik pen qaýipsizdikke tónetin iri qaterlerdiń biri ekenin basa etti. Keńes músheleri bul qylmysty uıymdastyrýshylardy, oryndaýshylardy jáne qarjylandyrýshylardy jaýapqa tartýǵa shaqyrdy. Olar barlyq eldi halyqaralyq quqyq pen BUU Qaýipsizdik Keńesiniń qararlaryna sáıkes birlesip áreket etýge úndedi.
Aıta keteıik, 30 sáýirde Úndistan men Pákistan shekarasynda atys bolǵany týraly habarlaǵan edik.
Eske sala ketsek, 22 sáýir kúni qarýly adamdar Djammý men Kashmır odaǵy aýmaǵyndaǵy áıgili týrıstik qala — Pahalgamda terrorlyq shabýyl jasaǵan bolatyn. Áskerı kıim kıgen adamdar avtomattarmen oq jaýdyrǵan, 25 úndi azamaty men 1 nepaldyq qaza tapty. Qylmyskerler oqıǵa ornynan qashyp úlgergen.