Úndistan Qazaqstan azamattaryna tegin vıza engizedi
ASTANA. KAZINFORM – Astanada Úndistan Respýblıkasynyń 77 jyldyǵyna arnalǵan resmı qabyldaý ótti. Іs-shara barysynda Úndistannyń Qazaqstandaǵy Tótenshe jáne Ókiletti Elshisi ıÝ.K. Saılas Tangal ekijaqty yntymaqtastyqtyń negizgi baǵyttaryn atap ótip, qazaqstandyqtarǵa qatysty mańyzdy sheshimdi jarııalady.
Elshiniń aıtýynsha, Úndistan Úkimeti Qazaqstan azamattaryna týrıstik jáne medıtsınalyq maqsattarmen, sondaı-aq ilesip júretin tulǵalar úshin 30 kúnge deıingi merzimge tegin vıza berý týraly sheshim qabyldaǵan.
«Ekijaqty týrızmdi yntalandyrý maqsatynda Úndistan Úkimeti Qazaqstan azamattaryna 30 kúnge deıingi merzimge tegin vıza berý týraly sheshim qabyldady», – dedi dıplomat.
Onyń sózinshe, vızany onlaın formatta da, sondaı-aq Úndistan elshiligi arqyly tikeleı rásimdeýge bolady.
Sonymen qatar elshi týrıstik almasýdyń artyp kele jatqanyn atap ótti. Úndi taraptyń baǵalaýynsha, 2025 jyly Qazaqstanǵa kelgen úndi týrısteriniń sany shamamen 250 myń adamǵa jetken.
Sóz barysynda ıÝ.K. Saılas Tangal Úndistannyń búginde álemdegi tórtinshi eń iri ári eń jyldam damyp kele jatqan ekonomıkalardyń biri ekenin aıtty. El IT, jasandy ıntellekt, fınteh, farmatsevtıka jáne tsıfrlyq ınfraqurylym salalarynda turaqty ósim kórsetip otyr.
Budan bólek, elshi Úndistan men Qazaqstan arasyndaǵy strategııalyq áriptestiktiń nyǵaıyp kele jatqanyn atap ótti. Onyń aıtýynsha, eki memleket ShYU, BRIKS, AÓSShK, BUU jáne «Úndistan – Ortalyq Azııa» dıalogy aıasynda tyǵyz yntymaqtastyq ornatqan.
Sondaı-aq ekijaqty saýda kólemi shamamen 1 mlrd AQSh dollaryn quraıtyny aıtylyp, bul kórsetkishtiń áleýeti áldeqaıda joǵary ekeni atap ótildi.
Іs-shara sońynda Úndistan elshisi barsha qonaqty Respýblıka kúnimen quttyqtap, eki el arasyndaǵy yntymaqtastyq aldaǵy ýaqytta da damı beretinine senim bildirdi.
Aıta keteıik, Úndistanda beti búrkengen adamdarǵa zergerlik dúkenderge kirýge tyıym salyndy.