Úmitjan Eńsebaeva: Ustazdyq – men úshin úlken mártebe
Respýblıka kúnine oraı Memleket basshysy Qasym-Jomart Toqaevtyń qolynan «Qazaqstannyń eńbek sińirgen ustazy» qurmetti ataǵyn alǵan Stepnogor qalasyndaǵy №4 «Bolashaq» oblystyq mamandandyrylǵan mektep-lıtseı ınternatynyń muǵalimi Úmitjan Eńsebaeva qýanyshyn bólisti, dep habarlaıdy Kazinform tilshisi.
Úmitjan Soltanqyzy 1966 jyly Soltústik Qazaqstan oblysynyń Ýálıhanov aýdanyndaǵy Qaırat aýylynda dúnıege kelgen.
Kókshetaý pedagogıka ınstıtýtyn qazaq tili men ádebıeti pániniń muǵalimi mamandyǵy boıynsha bitirgen.
Eńbek jolyn 1988 jyly týǵan aýylyndaǵy orta mektepte geografııa jáne mýzyka pániniń muǵalimi bolyp bastaǵan.
2018 jyldan bastap qazirgi ýaqytqa deıin Stepnogor qalasyndaǵy № 4 «Bolashaq» oblystyq mamandandyrylǵan mektep-lıtseı ınternatynda qazaq tili men ádebıeti pániniń muǵalimi bolyp jumys isteıdi.
Úmitjan Soltanqyzy zertteýshilik talantymen, ádistemelik sheberliktiń joǵary deńgeıimen, shyǵarmashylyǵymen, zeıinimen jáne óz jumysyna jaýapkershilikpen qaraýymen erekshelenedi.
2023 jyly «Ushqyr oı men sheshen til» pedagogıkalyq jumysy oblystyq «Úzdik avtorlyq jumys» baıqaýynda úzdik dep tanyldy.
Úmitjan Soltanqyzynyń shákirtteri jyl saıyn respýblıkalyq deńgeıdegi baıqaýlarda top jaryp keledi.
Kóp jyldar boıy qazaq tili men ádebıeti páninen sabaq berip, eńbegi de eleýsiz qalmady.
Shákirtterin baıqaýlarǵa úzdik daıyndaǵany úshin Úmitjan Soltanqyzy 2020 jyly Qazaqstan Respýblıkasy Bilim jáne ǵylym mınıstriniń Qurmet gramotasymen, 2019 jyly Qazaqstan Respýblıkasy Bilim jáne ǵylym mınıstriniń alǵys hatymen, 2022 jyly Aqmola oblysy bilim basqarmasynyń Qurmet gramotasymen marapattalǵan edi.
Endi mine, Respýblıka kúni Memleket basshysy Qasym-Jomart Toqaevtyń qolynan «Qazaqstannyń eńbek sińirgen ustazy» qurmetti ataǵyna ıe bolyp otyr.
Eńbek ótili 35 jyldy quraıtyn ustaz bilim salasyndaǵy uzaq jylǵy tynymsyz eńbeginiń eleýsiz qalmaǵanyna qýanyshty.
— Respýblıka kúni qarsańynda Memleket basshysy túrli sala mamandaryn marapattap, erekshe iltıpat kórsetti. Sonyń ishinde ustaz retinde «Qazaqstannyń eńbek sińirgen ustazy» qurmetti ataǵyn alý — men úshin úlken baqyt. Bul — memleketimizdiń ustazdarǵa degen erekshe qurmeti dep bilemin, — dep qýanyshyn bólisti marapat ıesi Úmitjan Eńsebaeva.
Aıta ketsek, budan buryn Respýblıka kúnine oraı Aqmola oblysynda bir top kitaphanashy marapattalǵan edi.
