Ulytaýdan jaıaý shyqqan 72 jastaǵy qarııa 4,5 myń shaqyrym júrip Petropavlǵa jetti
Ulytaýdyń 72 jastaǵy turǵyny Sársenbaı Qotyrashovty Petropavl mańyndaǵy Pestroe kóliniń janynda qala ákimdiginiń ókilderi, qoǵam belsendileri jáne jýrnalıster qarsy aldy. Úsh aı boıy jolda kele jatqan aqsaqal osy kúnge deıin 12 oblysty, 15 qalany aralap ótken. Jolda alty aıaq kıim aýystyrǵan. Petropavlǵa alǵash ret kelip tur.
«Aýasy taza, jasyl qala eken. Joldary jaman emes. Qıyndyqsyz jeńis bolmaıdy. Saparǵa shyǵý týraly oı alty jyl buryn paıda boldy. Ol jaıly kóp armandadym. Biraq meni týǵan-týysym, otbasym, dostarym jibermedi. Keıin maqsatymdy aıtqannan keıin saltanatty túrde jolǵa shyǵaryp saldy.
Al maqsatym - qazaq tarıhynda Ulytaýdyń alatyn ornyn nasıhattaý, ekinshi maqsatym – qolóner sheberleriniń tizimin túgendeý, úshinshi maqsatym – umytylyp qalǵan ulttyq meıram – «Kókmaısa» qymyz merekesin qalpyna keltirip, jańǵyrtyp, kúntizbege belgiletsem deımin.
Ózimmen birge ulttyq taǵamdardy – baýyrsaq, qurt alyp júrip, jolda jeımin. Іshetin sýsynym – qymyz. Jolǵa shyqqanda zeınetaqym jetpeıdi ǵoı dep oılaǵanmyn. Darhan halqymnyń arqasynda kele jatyrmyn. Júrgen jerimniń barlyǵynda tamaǵym tegin, tósek-oryn tegin, sondaı-aq arasynda aıaq kıim satyp alýǵa, dóńgelek satyp alýǵa kómektesip qoıady.
Qazaq dalasy keń, halqy darqan, álemde bizdiń halyq sııaqty qonaqjaı halyq joq, oǵan kózim jetti. Sheshen-ıngýsh, nemis, káris aqsaqaldarynyń aıtqanyna osy saparymda kózim jetti», - deıdi saıahatshy ata.
60 kelilik arbasyn súıretken Sársenbaı ata jolda birqatar qıyndyqqa da kezikken.
«Buǵan deıin 4,5 myń shaqyrymdy júrip óttim, alda 5 oblys – 3,5 myń shaqyrym tur. Ystyqtyń da, jańbyrdyń da maǵan kedergisi joq. Jańbyr – halyqtyń nesibesi, jańbyr-jańbyr jaý dep júre berem. Keı joldar jóndelip jatyr, sol jerlerden ótkende kóp qıyndyq kórdim. Kósh júre túzeledi ǵoı, jaman joldar barshylyq.
Taǵy bir baıqaǵanym, joldyń boıynda qoqys tastaıtyn jáshik, eshbir deni durys ájethana joq. Saldarynan jurt jegen, ishkeninen qalǵanyn laqtyryp kete beredi. Jol boıy qoqys. Bul másele sheshiledi, bolashaqta bári jaqsy bolady dep oılaımyn», - deıdi Sársenbaı Qotyrashov.
Saıahatshynyń aıtýynsha, jolda kele jatqanda ony adamdar tanyp jatady. Kúnine 200-300 kólik toqtap, hal-jaıyn suraıdy. Sıgnal berip, qol bulǵap ótedi. Keıbiri sýretke túsedi, suraqtaryn qoıady.
Kúnine eń keminde 40 shaqyrym jaıaý júretin aqsaqal Petropavlda mýzeılerdi aralap, jergilikti qolónershilermen kezdespek. Keıin saıahatyn jalǵastyrady. Qostanaıǵa bet alyp, Aqtóbe, Oral, Atyraýdy basyp ótpek. Al Aqtaý – saparynyń sońǵy núktesi. Sol jerden elordaǵa poıyzben attanyp, Prezıdentpen kezdespek.
