Ulyqbek Esdáýlet: Osy jazda Azııa elderi qalamgerleriniń birinshi forýmy ótedi
«Mádenıet týraly zańnyń aıasynda «Kınematografııa týraly» zańnyń qabyldanǵany týraly jańa aıtylyp ketti. Adamnyń qyzyǵýshylyǵyn oıatatyn nárse. Kıno degen shynyn aıtqanda damýy tıis sala. Baıaǵyda bir zamanda ádebıet damyp ketip edi, endi kınomyz ozaıyn dep tur. Soǵan qyzyǵa otyryp, men quttyqtaǵym keledi. Sonymen qosa, ishimdegi bir usynysty aıta ketsem deımin. Mádenıet degen zańnyń ishinde birde-bir ádebıetke qatysty bap joq. Sondaı-aq bizge bir jeke zańnyń keregi joq, bizge tek bir bap qana engizip berse, jańaǵydaı qosymsha qun salyǵynan qutylyp, qalamaqymyz óser edi, bizdiń de jolymyz ashylar edi dep oılaımyn», - dedi Ulyqbek Esdáýlet Astanada ótken QR Mádenıet jáne sport mınıstrliginiń keńeıtilgen alqa májilisinde.
Qazaqstan Jazýshylar odaǵynyń tóraǵasy óz sózinde bıyl Mádenıet jáne sport mınıstrligimen birlese otyryp ótkiziletin sharalardy atap ótti.
«Onyń eń úlkeni - 45 jyldan beri ótpegen halyqaralyq, dúnıejúzilik dárejedegi forým. Osydan 45 jyl buryn keńes zamanynda, sonaý 1973 jyly Azııa-Afrıka jazýshylarynyń Almatyda konferentsııasy ótken edi. Ony áli bizdiń qalamgerler de, oqyrmandar da ańyz qylyp aıtady. Bıylǵy jyly biz sonyń bir jalǵasyndaı, Azııa elderi qalamgerleriniń birinshi forýmyn ótkizgeli otyrmyz. Bul - 14-21 tamyz aralyǵynda ótedi. Bul bıýdjetke salynyp, maquldanǵan dúnıe», - dedi Ulyqbek Esdáýlet.
Aqyn óz sózinde sonymen qatar bıyl Jazýshylar odaǵynyń qurylǵanyna 85 jyl, Sáken Seıfýllın, Іlııas Jansúgirov pen Beıimbet Maılınniń týǵanyna 125 jyl tolatynyn atap ótti.
