Ulybrıtanııada jeti sábıdi óltirdi dep aıyptalǵan medbıke sottalyp jatyr
Kýágerlerdiń aıtýynsha, Letbı shala týǵan náreste qyzdy óltirýge úsh ret áreket etip, pıǵylyn tórtinshisinde iske asyrǵan. Ol balany óltirgen soń ata-anasyna kóńil aıtý qaǵazyn joldady.
Alaıda, medbıke ózine taǵylǵan 22 aıyptyń bárin joqqa shyǵardy.
Bul – jalpy profıldegi kópsalaly aýrýhana. Aıyptaýshy Nık Djonsonnyń aıtýynsha, onyń neonatologııa fılıalynda sábılerdi ádeıi ýlaıtyn adam jumys istegen.
«2015 jyldyń qańtaryna deıin grafınıa Chester aýrýhanasynyń neonatologııa bóliminde náreste óliminiń statıstıkasy basqa bólimdermen shamalas edi. Alaıda, kelesi bir jarym jyl ishinde kóz jumǵan sábıler sany kúrt ósken», - dep atap ótti ol.
Bul ósimdi aýrýhana konsýltanttary da baıqady. Olardy tańqaldyrǵany - esinen tanǵan balalarǵa ýaqytyly júrgizilgen reanımatsııalyq sharalardyń kómektespegeni, al keıin keıbireýleri kútpegen jerden jáne tolyǵymen saýyǵyp ketken.
Bólimdegi ólim men aıaqasty saýyǵyp ketý jaǵdaılarynyń sebepteri anyqtalmaǵanymen, onyń bárinde medbıke Lıýsı Letbı bolǵany belgili boldy.
Aýrýhana basshylyǵy qyzmetkerdi kúndizgi aýysymǵa aýystyryp, polıtsııadan tergeý júrgizýin surady.
Polıtseıler Letbıdiń úıin tintip , qaı balaǵa qandaı dári salǵany jazylǵan kúndeligin tapty.
Letbı bolsa, ózine taǵylǵan aıyptyń bárin teriske shyǵaryp, sábılerge sanaly túrde zııan keltirý oıyna kirip-shyqpaǵanyn aıtty.
Sot jalǵasyp jatyr.
Foto: bbc.com