Ulybrıtanııada energetıka daǵdarysy: Úkimet únemdeýge yntalandyryp jatyr

LONDON. QazAqparat - Osy aptada Ulybrıtanııada kún kúrt salqyndap, elektr energııasyna degen suranys artýy múmkin. Buǵan qosa Eýropadan sýasty kabelderi arqyly ákelinetin jaryq tasymaldanbaı qalady degen qaýip bar. Halyqty únemdeýge yntalandyrý maqsatynda úkimet túrli áreketterge baryp jatyr, dep habarlaıdy QazAqparat tilshisi.

Londonda shaǵyn eki bólmeli páter ıeleri elektr energııasy men kógildir otyn úshin aıyna teńgemen 200 myń tóleýge májbúr.

Peshti kúnine eki mezgil ǵana qosyp, jaryqty únemdegenniń ózinde osyndaı baǵa shyǵady.

Tipti úkimettiń komýnaldyq tólemge dep aı saıyn járdemaqy retinde beretin 38 myń teńgesi kómektespeı jatyr.

Nátıjesinde úı durys jylymaıdy, otbasy músheleri aýyra bastaıdy. Qabyrǵalardy zeń basyp, ol da densaýlyqqa zııan keltiredi.

Merı Obomeze jergilikti bılik jalǵa bergen arendalyq páterde turady. Aı saıynǵy tabysy 900 myń teńgemen búkil otbasyn asyrap otyr. Eki balasy oqýshy, kúıeýi - turaqty tabysy joq jýrnalıst-frılanser.

Demalys kúnderi tań atysymen 52 jastaǵy áıel Londonnyń ońtústik shyǵysynda ornalasqan Výlvıch ortalyǵynyń kitaphanasyna bet alady. Maqsaty - rýhanı baıý emes, eki saǵatqa bolsa da jylynyp qaıtý.

«Biz bul aıda jylýdyń aqysyn tóleı almaımyz. Ótken aıda da keıinge qaldyra turý jóninde ótinish bildirdik. Balalarym tońyp qalǵanyn aıtqanda janym aýyrady. Sondyqtan jylýdy jarty saǵatqa qosyp, qaıta óshirýge týra keledi», - deıdi Merı Obomeze.

Mundaı jyly uıalardy búkil qala boıynsha tabýǵa bolady. Olardy aýdandyq merııalar shirkeý, kitaphana sııaqty qoǵamdyq oryndarda kóptep ashyp tastaǵan.

Keıbiri tipti tegin vaı-faı, tamaq pen sýsyndy da usynady. Biraq kópshilik munda kelýge qysylady eken.

«Ortalyǵymyzdaǵy jyly uıany halyq arasynda keńinen nasıhattaýǵa tyrysyp jatyrmyz. Biraq, meniń oıymsha, kóbi, ókinishke qaraı, munda kelýge azdap uıalady. Aıtqym kelgeni, qazirgi zamanda bul álbette uıat jaǵdaı, biraq basqa amalymyz joq», - deıdi kitaphana qyzmetkeri Emı Djekson.

Bul aptada Tumandy Albıonda kún salqyndap, elektr energııasyn paıdalanýshylar qatary artady degen qaýip bar.

Eýropadan sýasty kabelderi arqyly tasymaldanatyn jaryq ta jetpeýi múmkin.

Oǵan degen suranysty tómendetý úshin ulttyq elektr jelileri operatory jańa bastamany qolǵa aldy.

Budan bylaı keshki ýaqytta, máselen, kir jýý jáne keptirý mashınasyn qospaǵan tutynýshylar tólem boıynsha jeńildikterge ıe bola alady.

«Osylaısha biz jaryqty eń kóp tutynatyn kezde oǵan degen suranysty azaıtýǵa tyrysamyz. Ádette qysta elektr jelilerine salmaq keshki 5 pen 6 arasynda túsedi. Smart eseptegish quraldary bar turǵyndardyń bir jylda 100 fýntqa deıin aqsha únemdeýge múmkindigi bar», - deıdi Ulybrıtanııanyń ulttyq elektr jelileri operatorynyń atqarýshy dırektory Fıntan Slaı.

Elde qazir kún salqyn bolǵanymen, qatty jel joq. Jańartylmaly qýat kózi sanalatyn jel dıirmenleri kádege aspaı tur. Sondyqtan úsh kómir elektr stantsııasy qajet bolǵan jaǵdaıda qosylýǵa saqadaı saı tur.

Negizi Ýkraınadaǵy jaǵdaı Ulybrıtanııadaǵy tabıǵı gazdyń baǵasyn kúrt kóterip, ómir súrý qunyn qymbattatyp jiberdi.

Inflıatsııa Eýropa elderi arasynda buryn-sońdy bolmaǵan deńgeıge jetip, halyqty ábigerge salýda.

Foto: Global Look Press/IMAGO/Michael Bihlmayer