Ulybrıtanııa «Astana» halyqaralyq qarjy ortalyǵynyń ashylýyn quptaıdy

ASTANA. QazAqparat -  «Astana» halyqaralyq qarjy ortalyǵynyń tusaýkeseri sheńberinde QR Syrtqy ister mınıstri Qaırat Ábdirahmanov Ulybrıtanııanyń ınvestıtsııalar jónindegi memlekettik mınıstri, brıtandyq parlamentiniń múshesi Grem Stıýartpen kezdesti, dep habarlaıdy QazAqparat QR SІM baspasóz qyzmetine silteme jasap.

Brıtandyq mınıstr qazaqstandyq tarapty AHQO-nyń ashylýymen jáne Astananyń 20 jyldyq mereıtoıymen quttyqtap, ınvestıtsııalyq yntymaqtastyqty damytýǵa janjaqty qolǵabys kórsetýge Londonnyń daıyn ekenin bildirdi.

Óz kezeginde Q.Ábdirahmanov brıtandyq tarapty AHQO-nyń damýyna jáne nyǵaıtýyna qosqan mańyzdy úlesi úshin alǵys bildirip, brıtandyq kompanııalar, bankter jáne qarjy ınstıtýttar Ortalyqtyń jumysyna belsendi qatysýyna senim bildirdi.

Prezıdent Nursultan Nazarbaev AHQO-nyń tusaýkeserinde Astana jańa qarjy ortalyǵynyń qalyptasýyndaǵy Ulybrıtanııanyń rólin, sonyń ishinde aǵylshyn quqyq qaǵıdalary boıynsha jumys isteýi jáne Anglııa men Ýelstyń burynǵy joǵarǵy sýdıasy Lord Výlf bastaǵan bedeldi brıtandyq sýdıalar kirgen AHQO sotynyń erekshe qyzmetin atap ótti.

Kelissózder barysynda taraptar ekijaqty qatynastardyń, ásirese saýda-ınvestıtsııa salasyndaǵy yntymaqtastyqtyń strategııalyq sıpatyn atap ótti.

Sandyq júıege kóshirý, ınfraqurylymdyq jobalar, taý-ken ónerkásibi jáne aýyl sharýashylyǵy salalaryndaǵy yntymaqtastyqty tereńdetýdiń keń áleýeti atap ótildi. Qazaqstannyń kóliktik jáne tranzıttik áleýetin damytý maqsatynda QHR men Azııany eýropalyq, sonyń ishinde brıtandyq naryqpen baılanystyratyn «Beldeý men jol» bastamasyn is júzinde júzege asyrýǵa ózara qyzyǵýshylyq bildirildi.

Sondaı-aq, taraptar ekijaqty saıası jáne ekonomıkalyq yntymaqtastyqtyń qoldanystaǵy jáne perspektıvalyq tetikteri sheńberindegi baılanystardy damytý baǵytandaǵy  jaqsy serpindi saqtaýǵa kelisti. Osyǵan oraı, aldaǵy ekijaqty úkimetaralyq kezdesýler men ınvestıtsııalyq forýmdardyń kestesi talqylandy.