Uly dalanyń jeti qyry - Fordtar jerinde
Sharaǵa Norvegııa Koroldiginiń bılik, saıası partııalar, memlekettik emes jáne qoǵamdyq uıymdar, BAQ, bıznes, dıplomatııalyq korpýs, sondaı aq jergilikti qazaq dıasporasynyń ókilderi jınaldy.
Qazaqstan dıplomattary qonaqtar nazaryna Elbasy Nursultan Nazarbaevtyń «Qazaqstan joly» kitabyn norveg tilinde, Sırııadaǵy shıelenisti jaǵdaıdy sheshýdegi Astananyń úlesi týraly «Bitimger» eńbegin taǵy basqa kitaptaryn aǵylshyn tilinde usyndy.
Jıynǵa qatysýshylar Qazaqstan Prezıdentiniń «ATOM» bastamasyna qoldaý bildirip, iske asyrý maqsatynda ıadrolyq synaqtardy toqtatý jónindegi petıtsııaǵa qol koıý aktsııasyna qatysty.
Shaqyrylǵandar Elbasynyń Qazaqstan halqyna joldaýynda jarııa etilgen bastamalarymen jáne jaqynda jaryq kórgen «Uly dalanyń jeti qyry» maqalasynda aıtylǵan ulttyq tarıhymyzdyń, mádenıetimizdiń jahandyq órkenıetke qosqan úlesi týraly keńinen tanysty.
Sondaı aq, qonaqtarǵa Qazaqstannyń týrıstik múmkindikteri arnaıy usynyldy. Qazaqstannyń týrıstik habynyń jańa múmkindikteri jaıly «Qazaq týrızm» otandyq kompanııasy men keler jyly turaqty túrde Uly dala eline týrıstik saparlar uıymdastyrýdy qolǵa alǵan norvegııalyq «Vıtýs» kompanııasy jınalǵandarǵa tolyqqandy aqparat berdi. «Maksıshıpıng» logıstıkalyq kompanııasynyń kommertsııalyq dırektory Krıstıan Klemmetsen: «Qazaqstannyń týrıstik múmkindikterimen qatar tranzıttik, logıstıkalyq múmkindikteri de bizdi qyzyqtyrady. Bizdiń temirjol arqyly júk tasymaldaıtyn poıyzdarymyz Eýropadan Ortalyq Azııaǵa taýar tasıdy. Sondyqtan Qazaqstannyń qurlyqtaǵy logıstıkasyna suranys joǵary. Shynynda da, bul óte tıimdi marshrýt, teńiz jolynan jyldam, áýe qatynasynan áldeqaıda arzan», - dep atap ótti.
Qazaqstan Prezıdentiniń ulttyq sanany túletken «Uly dalanyń jeti qyry» maqalasynda aıtylǵan tereń oılardy jahanǵa jetkizý maqsatynda, qazaqtyń tarıhy men mádenıetinen mol maǵlumat beretin «Sán men Sahna» halyqaralyq festıvaliniń kórsetilimi boldy. Festıval dırektory, belgili etno dızaıner Haným Aıdashtyń bul skandınavııa eline ekinshi sapary. Osy joly festıval sheńberinde norvegııalyqtarǵa qyzylordalyq etnodızaıner Qarlyǵash Іlıasova men aqtaýlyq Móldir Bekibaevanyń «Shyn júrekten» kollektsııasy tanystyrylyp, jınalǵandardy tamsandyrdy.
Oslo qalasyndaǵy «Kon-Tıkı» murajaıynyń dırektory Martın Bıl: «Men úshin Norvegııadaǵy Qazaqstan kúnine qatysý úlken qurmet. Qazaq ulttyq kıim úlgileri tanystyrylǵan shoý óte keremet boldy. Qazaqstan Norvegııadan óte alys, sondyqtan men mıllıondaǵan skandınavııalyqtar sanatynda qazaq jerimen, mádenıetimen tanys emes edim. Alaıda, búgingi sharanyń arqasynda Uly dala elimen de, halqymen jaqynyraq tanysyp, tánti boldym», -dedi Oslo qalasyndaǵy «Kon-Tıkı» murajaıynyń dırektory Martın Bıl tań qalǵandyǵyn jasyrmaı.
Sýretteri álemniń ondaǵan elderinde jekelegen kollektsııalarda saqtalǵan, belgili sýretshi, Qazaqstan eńbek sińirgen mádenıet qaıratkeri Gúlmıra Telǵozıevanyń sýret kórmesi de Uly dala órkenıeti men ulttyq bolmysymyzdy vıkıngter eline tanytýdyń zańdy jalǵasy ispettes boldy.
«Norvegııadaǵy Qazaqstannyń ulttyq kúni» Qazaqstan táýelsizdiginiń 27 jyldyǵyna arnalǵan dıplomatııalyq qabyldaýmen aıaqtaldy.
Jıyn barysynda Norvegııa Koroldigindegi Qazaqstannyń ýaqytsha senimdi ókili Іlııas Omarov eki jaqty baılanysty damytý baǵytynda ústimizdegi jyly atqarylǵan jumystar jaıly aıtyp berdi. Dıplomat Qazaqstan Norvegııa elimen jan jaqty keńinen seriktestik ornatýǵa nıetti ekenin, «sondyqtan qazaqstandyqtar fordtar eli týraly, al norvegııalyqtardyń uly dala eli jaıly tanymy barynsha ósetini sózsiz», erekshe atap ótti.
