Ulttyq joba aıasynda BQO-nyń 300-den astam turǵynyna grant berildi

ORAL. QazAqparat – Batys Qazaqstan oblysynda 2021-2025 jyldarǵa arnalǵan kásipkerlikti damytý jónindegi ulttyq joba aıasynda bıyl jańa bıznes ıdeıalaryn júzege asyrý úshin 317 adamǵa memlekettik grant berildi, dep habarlaıdy QazAqparat tilshisi.

BQO Jumyspen qamtýdy úılestirý jáne áleýmettik baǵdarlamalar basqarmasynyń basshysy Almıra Tólegenovanyń Óńirlik kommýnıkatsııalar qyzmeti alańynda ótken brıfıngide málim etkenindeı, 317 turǵynnyń 54-i nemese 17 paıyzy – eńbekke qabiletti múgedektigi bar adamdar.

A.Tólegenovanyń sózine qaraǵanda, mal sharýashylyǵyn damytý úshin - 22 (40,7 paıyzy) turǵynǵa, qus ósirýge - 6 (11,1 paıyzy), ósimdik sharýashylyǵyn qolǵa alǵan - 1 (1,8 paıyzy) jáne kásipkerliktiń basqa salalaryn damytqysy kelgen 25 adamǵa (46,4 paıyzy) granttar berildi.

Bul baǵyttaǵy jumystar jalǵasyn taýyp, bıyl barlyǵy 405 adamǵa memlekettik grant berý kózdelgen.

Basqarma basshysynyń aıtýynsha, óńirde 24 351 adamnyń múgedektigi bar, bul – oblys halqynyń 3,7 paıyzy. Sonyń ishinde 2 965-i – 18 jasqa deıingi balalar.

«Memleket basshysynyń tapsyrmasymen halyqaralyq tájirıbede muqııat zerttelip, daıyndalǵan, bıylǵy 1 shildeden bastap kúsheni enetin Áleýmettik kodeksti basshylyqqa alyp, jumys jasaıtyn bolamyz. Áleýmettik kodeks aıasynda 9 zań kúshin joıyp, 50-den astam zańnamalyq aktilerge ózgertýler men tolyqtyrýlar engiziledi. Bul – TMD aýmaǵynda alǵash ret qoldanysqa engiziletin birtutas áleýmettik qujat. Ol adamnyń búkil ómir súrý kezeńin qamtıdy. Negizgi maqsat – múgedektigi bar azamattarǵa beriletin járdemaqyny ulǵaıtý, sondaı-aq arnaıy áleýmettik qyzmetterdi qoljetimdi etý», - dedi basqarma basshysy.

Osy aıdan bastap múgedektigi bar adamdarǵa, olarǵa kútim jasaıtyn adamdarǵa, asyraýshysynan aıyrylǵan otbasylarǵa beriletin járdemaqy mólsheri 14,5 paıyzǵa kóbeıedi. Jyl basynan beri járdemaqynyń mólsheriniń 8,5 paıyzǵa óskenin eskere otyryp, tólemder ótken jylǵy deńgeımen salystyrǵanda, 23 paıyzǵa kóbeıedi.

«Múgedektigi bar adamǵa qyzmet kórsetýge otbasy múshelerin tartý kózdeledi. Múgedektigi bar adamdardyń kútýshileri tıisti eńbekaqy jáne áleýmettik aýdarymdarmen qamtylyp, jeke kómekshi retinde rásimdeletin bolady. Bul jumysqa eńbekaqy tólenedi jáne kirisinen áleýmettik jáne zeınetaqy jarnalary aýdarylady. Osylaısha, otbasynyń eńbek jasyndaǵy jumyssyz músheleri jumysqa ornalasady. Sóıtip, áleýmettik táýekel týyndaǵan jaǵdaıda áleýmettik qamsyzdandyrý is-sharalarymen qamtylady», - deıdi vedomstvo basshysy.

Múgedektigi bar adamdarǵa basqalaı da qoldaý kórsetile beredi. Sonymen qatar olardy jumyspen qamtý da basty nazarda bolmaq.