Ulttyq ulannyń orkestri men ansambli Oralda kontsert qoıdy
«Batys» óńirlik qolbasshylyǵynyń baspasóz hatshysy, podpolkovnık Erbolat Sultanovtyń aıtýynsha, án men bı ansambliniń dırıjery aǵa leıtenant Darhan Rahymǵalıev bolsa, orkestrge podpolkovnık Ashat Muhamedıarov basshylyq etip keledi. Ortalyq orkestr 1998 jyly qurylsa, ansambl 2004 jyldan beri óner kórsetýde. Ujymda elýden astam adam bolsa, olardyń ishinde kelisimshart boıynsha qyzmet etip júrgender jáne mýzykalyq bilimi bar ofıtserler men kásibı ánshiler bar. Repertýardaǵy shyǵarmalar sany 200-den asady.
Ulttyq ulan jaýyngerleriniń moraldyq rýhyn kóterýdi maqsat etip qoıǵan orkestr men ansambldiń ónerin bul joly da ardagerlermen qatar «Batys» óńirlik qolbasshylyǵy men 5517-áskerı bólimniń jeke quramy, óńirdegi áskerı jáne quqyqtyq qurylymdar ókilderi qyzyǵa tamashalady. Kontsertte shetel klassıkteriniń kompozıtsııalarymen qatar qazaqtyń halyq ánderi de oryndaldy. Ásirese, oraldyqtarǵa Nurǵısa Tilendıevtiń týyndylaryna arnalǵan kompozıtsııa erekshe unady. Al «Qazaqstan» jáne «Aq Jaıyq - arý mekenim» ánderine kórermender qosyla shyrqady.
Kontsert sońynda «Batys» óńirlik qolbasshysynyń orynbasary, polkovnık Ashan Ibıshov ártisterge rızashylyǵyn bildirdi.
Aıta keteıik, atalmysh orkestr men ansambl Qazan qalasynda Tatarstan Respýblıkasy kúnine oraı osy aıdyń aıaǵynda ótetin áskerı orkestrlerdiń «Fanfary Kazanı» halyqaralyq festıvaline qatyspaqshy. 