Ulttyq stıl jáne jaıly demalys - Almaty Resort shıpajaıy óz qonaqtaryn qalaı qarsy alady
«Almaty Resort» shıpajaıy – «Oqjetpes» emdeý-saýyqtyrý kesheni» aktsıonerlik qoǵamynyń fılıaly. Ol álemdik standartqa saı, eń ozyq zamanaýı medıtsınalyq qurylǵylarmen jabdyqtalǵan. Kýrort Almatydan úsh shaqyrym jerde, Іle Alataýynyń eteginde, teńiz deńgeıinen 1 052 metr bıiktikte ornalasqan. Onyń jalpy aýdany 21 gektar. Sanatorııdiń basty erekshelikteriniń biri - onyń mıneraldy sýy. Ol 3 000 metr tereńdikten alynady. Odan shyqqan sýdyń temperatýrasy - 42 gradýs. Keıin ol arnaıy qoımada saqtalady jáne vanna bólmelerine 36 gradýs jyly temperatýramen beriledi.
Jeke uńǵymadan alynatyn mıneraldy sý
Mıneraldy sýdyń quramynda ıod, ftor, brom, marganets, kremnıı qyshqyly sııaqty mańyzdy mıkroelementter bar. Sý as qorytý júıesiniń, asqazan-ishek joldarynyń jáne basqa da organdardyń dertterin emdeýde taptyrmas shıpa. Sonymen qatar, ol túrli protsedýralarǵa, ıaǵnı mıneraldy vanna, gınekologııalyq, ishek jáne aýyz qýysynyń aýrýlary men ıngalıatsııa úshin qoldanylady. Mıneraldy sýdy paıdalanýdan basqa, munda balshyqpen emdeý protsedýralary bar.
«Bizdiń qonaqtar dárigerdiń nusqaýyna saı, derttiń deńgeıine baılanysty balshyqpen emdeledi. Ol Almaty oblysyndaǵy Tuzkól kólinen jetkiziledi», - dedi dırektordyń emdeý-ońaltý jumysy jónindegi orynbasary Saltanat Beısembaeva.
Medıtsınalyq blok
Sanatorııdiń medıtsınalyq blogy úsh qabatty ǵımaratta ornalasqan. Munda joǵary bilikti dárigerler qonaqtarǵa túrli qyzmetterdi usynady. Ár patsıenttiń jeke talaptary men medıtsınalyq kórsetkishterin tolyq eskere otyryp, tıimdi ońaltý jáne emdeý-saýyqtyrý baǵdarlamalary taǵaıyndalady. Demalýshylar kosmetologııa jáne estetıkalyq medıtsına ortalyǵynyń qyzmetterin paıdalana alady. Buǵan qosa, galokamerada (tuzdy úńgir) bolyp, SPA ortalyǵynda kúızelisten arylý terapııalaryn ala alady.
Ǵımarattyń birinshi qabatynda resepshn ornalasqan. Munda saǵat 10:30-dan 12:30-ǵa deıin barlyq demalýshylarǵa fıtoshaı jáne ottegi kokteıli usynylady. Fıtoshaı men shóp shaı ártúrli shópterden jınaqtalyp ázirlenedi. Onyń quramynda gúl jáne qurǵaq japyraqtar, jemis, ósimdik tuqymdary bolady.
«Bizde fıtoshaı dárigerdiń nusqaýy boıynsha júrek-qantamyrlary, tynys alý organdary dertimen aýyratyndarǵa qoldanylady. Ol ońaltý, medıtsınalyq-qalpyna keltirý sııaqty emdeý keshenine kiredi», - dedi ol.
Sanatorııdiń medıtsınalyq blogy zamanaýı qurylǵylarmen jabdyqtalǵan. Máselen, munda aǵzadaǵy ártúrli patologııalardyń damý qaýpin anyqtaý úshin «Medskaner BIORS» apparaty qoldanylady. Bul qurylǵydaǵy Velness (densaýlyq) baǵdarlamalyq kesheniniń kómegimen 10 túrli dıagnostıkadan ótýge bolady. Sanatorıı dárigerleri patsıenttiń dıagnozyna sáıkes, emdeý josparyn ázirleıdi. Bul jerde kardıologtar, terapevtter, nevropatologtar, endokrınolog, dıetolog, fızıoterapevt, ýrolog, oftalmolog, stomatolog sııaqty medıtsına mamandary jumys isteıdi.
«Fýnktsıonaldyq dıagnostıkaǵa keletin bolsaq, bizde barlyq organdardyń, býyndardyń, jumsaq tinderdiń ýltradybystyq zertteýi, Holter boıynsha EKG-niń táýliktik monıtorıngi, kardıogramma, spırografııa júrgiziledi. Sondaı-aq, bizdiń zerthana barlyq zamanaýı standarttarǵa saı keledi. Biz serologııalyq, bıohımııalyq, ımmýnofermenttik taldaýlar (IFA), check-up (chek ap) jasaımyz. ıAǵnı, bizdiń keshennen búkil zertteýler men keńesterdi alýǵa tolyq múmkindik bar», - dedi Saltanat Beısembaeva.
«Almaty Resort» shıpajaıyndaǵy fızıoterapııany erekshe atap ótýge turarlyq. Fızıoterapııa protsedýrasy kóptegen aýrýlardy emdeý úshin qoldanylatynyn kópshilik jaqsy biledi. Sanatorııdegi fızıoterapııa keshendi emdeý, aǵzany qalpyna keltirýdi jedeldetý, kóptegen derttiń aldyn alý, kóńil-kúıdi jaqsartý maqsatynda keńinen qoldanylady. Mysaly, SMT terapııasy (sınýsoıdaly modýlıatsııalanǵan tok), massajdyń ár túri: qurǵaq gıdromassaj, Karakalla vannalary, spa-kapsýlasy, mehanoterapııa (osy terapııanyń arqasynda bulshyqet, býyn aýrýlaryn emdeledi, sonymen qatar naýqastyń fızıkalyq jaı-kúıi jaqsarady) jáne jalpy massaj.
Fızıoterapııamen qatar, kelýshiler arasynda terrenkýr - emdik serýender de úlken suranysqa ıe. Terrenkýr - bul jattyǵý terapııasynyń bir tásili. Ol adamdy tózimdilikke úıretedi, júrek-qantamyr júıesi men tynys alý organdarynyń jumysyn jaqsartady, metabolızm protsesin, júıke júıeleriniń jumysyn qalypqa keltiredi, sondaı-aq aıaq-qol bulshyqetterin jattyqtyrady. Sanatorıı aýmaǵynda emdik serýenniń úsh túri bar. Olardyń uzyndyǵy 500-den 3 000 metrge deıin. Máselen, serýen baǵyttary tartymdy tabıǵat landshafttar arqyly ótedi. Sondyqtan tabıǵatpen baılanys adamnyń júıkesi men onyń psıhıkalyq haline paıdaly áser etedi.
Sanatorııdiń medıtsınalyq blogy kún saıyn demalyssyz saǵat 08:00-den 20:00-ge deıin jumys isteıdi. Munda 96 adam eńbek etedi, onyń 29-y dáriger, 49-y orta medıtsınalyq personal bolsa, 18-i kishi medıtsınalyq personal.
Meıramhana
Zamanaýı keshendi emdeý dári-dármektermen qatar, tıisinshe durys tamaqtanýdy da qamtýy tıis. Arnaıy ázirlengen dıetalyq taǵamdar aǵzany tezirek qalpyna keltirýge kómektesedi. Qant dıabeti jáne semizdik sııaqty keıbir aýrýlarda dıeta ustaný emniń negizgi ádisi sanalady. Sondyqtan sanatorııdiń dıetology ár demalýshyǵa densaýlyq jaǵdaıyna baılanysty arnaıy mázir taǵaıyndaıdy.
«Almaty Resort» shıpajaıynda jalpy sany 340 orynǵa arnalǵan úsh meıramhana bar. Munda a la carte keń máziri usynylady (bul - keshendi mázirden bólek, meıramhanadaǵy mázirden jeke taǵamdarǵa tapsyrys berý). Qonaqtar ulttyq taǵamdarmen qatar, sheteldik tamaqtardyń da dámin tata alady. As mázirine tek aspaz ǵana emes, shıpajaı dırektory Gúljanat Buǵybaeva da jaýapty. Bul basshylyq qyzmetke ol ótken jyldyń sońynda taǵaıyndaldy. Buǵan deıin Gúljanat Buǵybaeva parlamenttik jáne prezıdenttik ashanalardy basqardy.
«Bizdiń mázir tolyq ózgerdi. Biz ulttyq taǵamdar kúnin engizdik. Juma kúnderi tańǵy astan bastap, bizde ulttyq taǵamdar daıyndalady: et, kespe, qýyrdaq, baýyrsaq, sondaı-aq dámdi desertter, mysaly, maısók jáne basqalary. Sonymen qatar, sársenbide biz ózbek jáne ıtalıan ashanasynyń taǵamdaryn ázirleımiz. Jalpy, bizde kún saıyn mázir ózgeredi jáne olar bir-birine uqsamaıdy, qaıtalanbaıdy. Munyń bári bizdiń kelýshilerimiz úshin», - dedi Gúljanat Buǵybaeva.
Meıramhanalardyń jumys kestesi mynadaı: kún saıyn saǵat 09:00-den 10:00-ge deıin - tańǵy as, 11:00-de - qymyz terapııasy, 13:00-den 14:00-ge deıin - túski as, 16:00-de jeńil taǵamdar, 18:30-dan 19:30-ǵa deıin - keshki as. Birneshe saǵattan keıin qonaqtarǵa aıran usynylady. Meıramhanalarda jalpy sany 70 adam jumys istese, sonyń 25-i aspaz. Olar aýysymmen qyzmet etedi.
«Men munda 2017 jyldyń naýryz aıynan beri jumys istep kelemin. Jalpy qonaqúıler men meıramhanalardaǵy eńbek jolym osydan 10 jyl buryn bastalǵan. Mamandyǵym - býhgalter. Degenmen men tamaq ázirlegendi unatatynmyn. Men óz hobbıimdi kásibı túrde júzege asyrý kerek dep sheshtim. Kóp tájirıbe jasadym, jańa daǵdylardy úırendim, sońynda aspaz boldym. Iá, jumys ońaı emes, biraq eger adam óziniń súıikti isimen aınalyssa, onda eshqandaı qıyndyq bolmaıdy. Maǵan ulttyq jáne shyǵys taǵamdary kóbirek unaıdy. Biraq biz sanatorııde túrli taǵamdar ázirleımiz, tapsyrystar qabyldaımyz. Barlyq tamaq ázirleý tehnologııasy qatań saqtalady», - dep málim etti meıramhananyń bas aspazshysy Almas Osıpov.
Sondaı-aq, meıramhanalardyń biriniń zaly kıiz úı túrinde jasalyp, ulttyq naqyshtaǵy elementtermen bezendirilgenin atap ótken mańyzdy. Buǵan qosa, munda mýzykalyq aspaptar da qoıylǵan. ıAǵnı, nıet bildirgen kez-kelgen meıramhana qonaǵy dombyra sherte alady.
Qonaqtar
Sanatorııge egde jastaǵy adamdarmen qatar, jastar da kóp keledi. Munda demalý jáne emdelý úshin elimizdiń túkpir-túkpirinen qazaqstandyqtar, sondaı-aq, sheteldik azamattar da keledi. Keshendi emdeý 10 kún júrgiziledi, bir adamǵa shaqqandaǵy quny kúnine 34 myń teńgeden bastalady. Bul somaǵa standart sanatyndaǵy eki orynǵa arnalǵan bólme, kúnine bes ret tamaqtaný, keshendi emdeý, basseın kiredi.
«Qazir biz medıtsınalyq týrızmdi damytý boıynsha qarqyndy jumys istep jatyrmyz. Búginde bizge Reseı, Qytaı azamattary kelip jatyr», - dedi Gúljanat Buǵybaeva.
Ol demalýshylardyń kóbi kóktem men jaz mezgilderinde keletinin atap ótti. Sanatorııde balalar men úlkenderdiń bos ýaqytyn tıimdi ótkizýi úshin jaǵdaı jasalǵan. Em-sharalardan bos ýaqytta qonaqtar sport zalyna, kosmetologııalyq kabınetke, kitaphanaǵa bara alady. Munymen qatar, bılıard, karaoke, kınoteatr bar. Al, keshke talantty ánshiler qonaqtarǵa klassıkalyq mýzyka kontsertin usynady.
«Maǵan bul jer erekshe unaıdy. Biz jyl saıyn jubaıymyzben birge emdelýge jáne demalýǵa kelemiz. Shıpajaı aýmaǵy tynysh, qyzmetkerler óte sypaıy, óz salasynyń mamandary. Bul óte mańyzdy. As úıge keletin bolsaq, taǵamdar óte dámdi daıyndalady. Sondaı-aq, qymyz terapııasy bar. Ol óte paıdaly», - deıdi QR Eńbek sińirgen qaıratkeri, akter, rejısser Baltabaı Seıtmamytuly.
Sensorlyq bólme
Shıpajaı basshylyǵy qazir Kazakh Nomad Resort tujyrymdamasyn qarqyndy engizip jatyr. Onyń basty maqsaty - qazaq halqynyń baı mádenıetiniń elementterin, onyń dástúrlerin servıske, tamaq mázirine, zaldar men bólmelerdi bezendirýge engizý. Mysaly, sanatorııde jańa jyldan bastap ulttyq stılde bezendirilgen sensorlyq bólme (relaksatsııa bólmesi) ashyldy. Bul adamnyń qabyldaý, seziný júıelerin damytýǵa arnalǵan qurylǵylarmen jabdyqtalǵan arnaıy bólme. Munda jasalǵan jaǵdaı psıhıkalyq jáne moraldyq tynyshtyqta otyryp, adamnyń óz-ózimen jáne basqalarmen úılesimdikte bolýyna, júıke júıesin qalpyna keltirýge múmkindik beredi.
«Sensorlyq bólme relaksatsııa úshin arnaıy jasalǵan. Bul bizdiń emdeý baǵdarlamamyzǵa kiredi. Demalýshylar munda kelgende balalyq shaǵyna saıahat jasaǵandaı bolady. Bólme demalýǵa, tynyshtyqta jatýǵa jáne óz máselelerin umytýǵa arnalǵan. Adamdar munda kóp ýaqyt ótkizgisi keledi, biraq seans ýaqyty 15-30 mınýt», - dep túsindiredi sanatorıı basshysy.
Aıta ketý kerek, sensorlyq bólmede sákiler ornatylǵan, sándik ósimdikter qoıylǵan. Al fonda áıgili kúıler men adamnyń júıke júıesine paıdaly áser etetin mýzykalar oınap turady. Bul demalýshylar úshin umytylmas tabıǵı atmosferaǵa enýge múmkindik beredi.
«Jalpy bizdiń sanatorıı óte biregeı. Onyń jumys istep kele jatqanyna 55 jyl boldy. Ony Dinmuhamed Qonaev qurǵan. Qazir munda barlyǵy 325 adam qyzmet etedi. Biz árbir patsıenttiń jeke talaptary men medıtsınalyq kórsetkishterin tolyq eskerip, tıimdi ońaltý jáne emdeý-saýyqtyrý baǵdarlamalaryn usynamyz. Óıtkeni, emdeý protsesindegi qamqorlyq pen jeke kózqaras - bizdiń medıtsınalyq jáne sanatorıı-kýrorttyq qyzmetterimizdiń basty artyqshylyǵy», - dep atap ótti Gúljanat Buǵybaeva.
Shıpajaıda mádenı is-sharalarǵa, ıaǵnı Naýryz merekesi, kórme, aktsııalar ótkizýge erekshe kóńil bólinedi. Sondaı-aq, munda fılmder men telehıkaıalar jıi túsiriledi.
