Ulttyq mýzeıde otandyq jýrnalıstıka tarıhyna arnalǵan kórme ashyldy
Bul týraly QazAqparat Ulttyq mýzeıdiń baspasóz qyzmetine silteme jasap.
Atalmysh sharany QR Aqparat jáne qoǵamdyq damý mınıstrligi men QR Mádenıet jáne sport mınıstrligi birlese uıymdastyrdy.
Kórmege qazaq baspasóz basylymdarynyń, radıosynyń, televızııasynyń tarıhynan syr shertetin eksponattar qoıyldy.
«Biz osy salaǵa jaýapty mınıstrlik retinde jýrnalısterge tartý jasaýdy oılaǵan edik. Endi olardyń ishinde, árıne, birneshe josparymyz bar. Búgin solardyń alǵashqysy retinde Mádenıet mınıstrliginiń de, osy Ulttyq mýzeıdiń de qoldaýymen arnaıy baspasóz kórmesin ashýdy jón kórdik. Osyǵan qolǵanat jasaǵan, kómek kórsetken bizdiń áriptesterimizdiń barshasyna shynaıy rızashylyq bildiremin»,- dedi QR Aqparat jáne qoǵamdyq damý mınıstri Darhan Qydyráli.
Sonymen qatar Darhan Qýandyquly «Qazaq» gazetiniń alǵashqy sany 2 aqpan kúni jaryq kórýine oraı osy kúndi Qazaq ulttyq baspasóziniń kúni dep jarııalaý týraly usynys bolǵanyn jáne bul usynystyń qoldaý tapqanyn habarlady.
QR Mádenıet jáne sport vıtse-mınıstri Nurqısa Dáýeshov óziniń quttyqtaý sózinde: «Meniń oıymsha adamǵa kóńil-kúı syılaıtyn kásipterdiń ishinde eki kásip bar, onyń biri – jýrnalıstıka, ekinshisi – mádenıet, sebebi adam balasy jaqsy jańalyq estise, jaqsy habar estise qýanady, kóńili marqaıady jáne de ádemi áýen tyńdasa, ádemi, mynandaı bizdiń óner adamdarynyń qolynan shyqqan kartınalardy kórse kóńilderi kóteriledi, sondyqtan biz tańdaǵan mamandyqtardyń adam balasyna paıdasy zor dep esepteımin»,- dep aıtty.
Kórmeniń ashylýyna qazaq jýrnalıstıkasynyń ardagerleri Saýytbek Abdrahmanov pen Álibek Asqarov qatysyp, BAQ qyzmetkerlerine ózderiniń júrekjardy aq tilekterin jetkizdi.
Kórme 16 shildege deıin jalǵasady.
