Ulttyq qordyń valıýta aktıvteri qazan aıynda 1 mlrd dollarǵa azaıdy

ALMATY. QazAqparat - Aldyn ala málimetter boıynsha, Ulttyq qordyń valıýta aktıvteri qazan aıynda 1 mlrd dollarǵa azaıyp, qazan aıynyń sońynda 56,34 mlrd dollardy qurady. Bul týraly Ulttyq bank tóraǵasynyń orynbasary Álııa Moldabekova aıtty, dep habarlaıdy QazAqparat tilshisi.

Onyń aıtýynsha, pandemııanyń ekinshi tolqyny táýekelderiniń iske asyrylýy naryqty qaıtadan tómendeý jaǵyna ózgertti. Máselen, MSCI jahandyq aktsııalar ındeksi qazanda 3%-ǵa tómendedi. Nátıjesinde aǵymdaǵy jylǵy 10 aıda jahandyq aktsııalardyń kiristiligi teris jáne (-) 1%-dy quraıdy.

«Naryqtaǵy ınvestıtsııalyq kiristiń quldyraýyna baılanysty,Ulttyq qordyń ınvestıtsııalyq kirisi qazanda teris qalyptasyp, (-) $470 mln boldy, onyń ishinde aktsııalar portfeliniń quldyraýy $390 mln-ǵa jýyq boldy. Sońǵy aılardaǵy teris serpinge qaramastan Ulttyq qordyń ınvestıtsııalyq kirisiniń jyl basynan bastap oń bolyp qalatynyn jáne shamamen 950 mln bolatynyn atap kórsetken jón»,– deıdi Álııa Moldabekova.

Bıýdjetke kepildi transfertterdi bólý túrinde Qordan alý qazanda 230 mlrd teńge boldy. Osyǵan baılanysty Ulttyq bank Ulttyq qordyń valıýtalyq aktıvterin shamamen $534 mln somasyna satty.