Ulttyq bank tóraǵasy ınflıatsııa deńgeıine túsinik berdi
«Qazaqstandaǵy ınflıatsııa bıylǵy jylǵy maýsymda 7,9%-ke deıin kúrt kóterilgennen keıin ósýdi jalǵastyryp, shildede 2017 jyldan beri eń joǵary mán – 8,4%-ke jetti. Azyq-túlik naryqtarynda teńgerimsizdikterdiń jıi oryn alýy, shıkizatqa álemdik baǵanyń ósýdi jalǵastyrýy jáne negizgi saýda seriktester bolyp sanalatyn elderde, ásirese Reseıde ınflıatsııalyq turǵyda joǵary bolýy aıasynda ınflıatsııanyń jedeldeýi ornyqty sıpatqa ıe bolýda», - dedi E. Dosaev.
Onyń aıtýynsha, kókónisterdiń jekelegen túrleri baǵasynyń jazǵy aılarǵa tán emes kúrt qymbattaýy nátıjesinde bıylǵy shildede 10,6 paıyzdan 11,0 paıyzǵa deıin ulǵaıǵan azyq-túlik ınflıatsııasy jyldyq baǵanyń ósýine burynǵysynsha kóp úles qosty. Et pen ósimdik maıynyń qymbattaýy da qosymsha qysym kórsetýdi jalǵastyrýda.
«Azyq-túlikke jatpaıtyn ınflıatsııa uzaq ýaqyt paıdalanylatyn taýarlar jáne janar-jaǵarmaı baǵasynyń ósý qarqynynyń jedeldeýine baılanysty 6,9%-dan 7,2%-ǵa deıin ósti. Aqyly qyzmetter ınflıatsııasy kommýnaldyq qyzmetterge tarıfterdiń ósýi jáne jekelegen naryqtyq qyzmetterdiń qymbattaýy aıasynda 5,6 paıyzdan 6,1 paıyzǵa deıin jedeldedi. Azyq-túlik, janar-jaǵar maı baǵalarynyń aıtarlyqtaı ósýin, elektr energııasy baǵasynyń kóterilýin, fıskaldyq yntalandyrýdyń barynsha kúsheıýin eskere otyryp, Ulttyq banktiń aldynala baǵalaýy boıynsha ınflıatsııa 2021 jyldyń sońyna taman 6-7% dálizinde kútiledi. Bıylǵy jylǵy tamyz-qyrkúıekke josparlanǵan aldaǵy boljamdy raýnd aıasynda jańartylǵan boljamdar beriletin bolady. Inflıatsııalyq protsesterdiń aıtarlyqtaı jedeldeýi jaǵdaıynda, júrgizilip otyrǵan aqsha-kredıt saıasaty sheńberinde baǵa turaqtylyǵyn qamtamasyz etý úshin Ulttyq bank bıylǵy 26 shildede bazalyq stavkany 9,25 paıyzǵa deıin 25 bazıstik tarmaqqa arttyrý týraly sheshim qabyldady», - dep tolyqtyrdy UB basshysy.