Ulttyq bank telefon alaıaqtarynyń jańa shemalary týraly eskertti
Ulttyq bank telefon alaıaqtarynyń óz «ókilettigin» nemese joq shottary men aýdarymdaryn rastaý úshin jalǵan qujat usyný faktileri jıilep jatqanyn málimdedi.
«Eskertemiz: alaıaqtar ózin Ulttyq bank qyzmetkeri retinde tanystyryp, QR azamattarynyń qarajatyn jymqyrý maqsatynda jańylystyrýǵa tyrysady. Sonymen qatar, bul shemalar «arnaıy operatsııa» degen jeleýmen «quqyq qorǵaý organy qyzmetkerleriniń qatysýymen» júzege asyrylyp jatqandaı bolady. Sol is-áreketiniń zańdylyǵyn rastamaq bolyp «Ulttyq banktiń qyzmetkerine» qońyraý shalady, qyzmetkerdiń jalǵan kýáligin usynyp, banktik aýdarymdar úshin derekter jiberedi», - dep jazdy vedomstvodan.
Mundaı qujattar, kóbine, azamattyń nesıelik qaryzyn óteý úshin azamattar aýdarǵan qarajaty bar bankte shoty nemese seıftik uıashyǵy baryn rastaıtyn aqparatty qamtıdy. Budan basqa, qujatta «ýákiletti tulǵalardyń» qoıǵan qoly, aty-jóni, móri jáne basqa da rastaıtyn elementter kórsetiledi.
«Banktik operatsııalardy rastaıtyn jalǵan qujattardy nemese jalǵan sýreti bar kýálikterdi paıdalanǵany – azamattardyń senimin oıatady jáne alaıaqtarǵa qomaqty somany aýdarýǵa májbúrleıdi.
Osyǵan baılanysty Ulttyq bank «quqyq qorǵaý júıesi qyzmetkerlerinen» nemese «Ulttyq bank qyzmetkerinen» telefon arqyly qońyraý túskende áńgimeni úzip, alaıaqtyq maqsatta oılastyrylǵan «arnaıy operatsııalardy» júrgizýge qatyspaý kerek ekenin jetkizedi. Budan ári 1477 nómiri boıynsha Ulttyq banktiń baılanys ortalyǵyna nemese quqyq qorǵaý organdaryna júginýge bolady», - delingen habarlamada.
Ulttyq Bank mobıldi qosymshalardy ornatpaýdy, óziniń derbes derekterin jarııalamaýdy, uıaly telefondy qashyqtan basqartpaýdy jáne telefonmen áńgime kezinde alynǵan nusqaýlar boıynsha qarajatty úshinshi tulǵanyń shotyna aýdarmaýdy suraıdy.
Ulttyq bank jeke tulǵalarǵa qyzmet kórsetpeıtinine jáne halyqpen aqshalaı esep aıyryspaıtynyna nazar aýdaramyz. Ulttyq banktiń qyzmetimen nationalbank.kz resmı saıtynda tanysýǵa bolady.
Foto: nationalbank.kz
