Ulttyq bank ókili indet taraǵan tustaǵy ekonomıkalyq kórsetkishter týraly baıandady
Aǵymdaǵy jyly álemniń kóptegen elderiniń ekonomıkasyna koronavırýstyq ınfektsııanyń (COVID-19) taralýyna baılanysty faktorlar áser etti. Búkil álemde, onyń ishinde Qazaqstanda úkimetter qabyldaǵan shekteý sharalary, sondaı-aq olardyń saldary ekonomıkalyq belsendiliktiń aıtarlyqtaı tómendeýine ákeldi. Buǵan naqty sektordaǵy kásiporyndardyń aıtarlyqtaı nasharlaýy da dálel bolyp otyr.
«Ulttyq bank júrgizgen saýalnama qorytyndysyna sáıkes, respondent kásiporyndardyń kópshiligi iskerlik belsendiliktiń edáýir nasharlaýy 2020 jylǵy sáýirde bolǵanyn kórsetedi. Osylaısha, iskerlik belsendilik ındeksi 2016 jylǵy qyrkúıekten bastap alǵash ret 37,2-ge deıin tómendedi. Indekstiń quramdas bólikteri boıynsha da rekordtyq tómendeý baıqaldy: qyzmet kórsetý salasyndaǵy ındeks 34,8, qurylysta – 36,5, ónerkásipte – 42,1 qurady. Kúrt tómendeý 2020 jylǵy 16 naýryzdan bastap elde tótenshe jaǵdaı rejıminiń jáne 2020 jylǵy 19 naýryzdan bastap Nur-Sultan jáne Almaty qalalarynda karantın engizilýine baılanysty boldy»,–dedi Jandos Shaımardanov.
Onyń aıtýynsha, karantınge túsken qalalar men oblystardyń tizimi vırýs juqtyrý jaǵdaılarynyń anyqtalýyna qaraı keńeıip otyrdy, bul naqty sektordyń kóptegen sýbektileriniń qyzmetin toqtatty.
«2020 jylǵy mamyr-maýsymda karantın rejımi báseńdegen saıyn ekonomıkalyq protsesterdiń jandanýy baıqaldy. Osylaısha, kásiporyndardyń baǵalaýy boıynsha, iskerlik belsendilik ındeksi 2020 jylǵy sáýirdegi eń tómen quldyraýynan keıin maýsymda 46,8 deıin qalpyna keldi. Eldegi epıdemıologııalyq jaǵdaıdyń nasharlaýyna baılanysty karantın rejımi 2020 jylǵy shildede qaıta engizilip, 17 tamyzǵa deıin uzartyldy. Bul naqty sektor kásiporyndarynyń iskerlik belsendilik ındeksiniń shildede 44,7-ge deıin qaıta tómendeýine jáne tamyzda 45,4-ke deıin azdap ósýine ákeldi»,– dedi spıker.
Karantın sharalaryn kúsheıtý qyzmet kórsetý salasy men ónerkásipke barynsha teris áser etti.
«Іskerlik belsendilik ındeksi shildede (44,7) tómendegennen keıin tamyzda 45,4-ke deıin ósti. Naqty sektorda ekonomıkanyń qalpyna kelýi qyzmet kórsetý salasyndaǵy kórsetkishtiń ulǵaıýy esebinen boldy, onda ındeks 43,1-den 44,2-ge deıin kóterildi. Ónerkásipte 0,3 tarmaqqa 48,3-ke deıin ulǵaıý baıqalady. Bul jańa tapsyrystardyń shamaly ósýine baılanysty»,– dedi Ulttyq banktiń aqsha-kredıt saıasaty departamentiniń dırektory Jandos Shaımardanov.
Tamyzda bıznes-klımat ındeksi 4,2 tarmaqqa jaqsardy jáne (-) 3,0 mánine jetti, alaıda áli de teris aımaqta tur. Sonymen qatar, respondentter qyrkúıekte bıznes júrgizý jaǵdaıy jaqsarady dep kútýde.
Іskerlik belsendilik ındeksi kásiporyndarǵa olardyń aǵymdaǵy kórsetkishteri men bolashaqtaǵy kútiletin ózgeristeri boıynsha júrgizilgen saýalnama negizinde qalyptasady. Tamyzda saýalnamaǵa 447 kásiporyn qatysty.
