Ulttyq bank: Kartochkalar boıynsha tólem qolma-qol eseptesý kórsetkishinen asty
Osy operatsııalardyń kólemi 2018 jylǵy derekterden 52%-ǵa asyp, 30,4 tlrn teńgeni qurady.
«Kartochkalyq operatsııalardyń negizgi úlesi – qolma-qol aqshasyz tólemder men aqsha aýdarymdary. 2019 jyldyń qorytyndysy boıynsha tólem kartochkalarymen júrgizilgen tórt operatsııanyń árbir úsheýi qolma-qol aqshasyz tásilmen júrgizildi. Bul rette, 2019 jylǵy qyrkúıekte qolma-qol aqshasyz operatsııalardyń aı saıynǵy kólemi aqshany alý boıynsha operatsııalar kórsetkishinen alǵash ret asty», - dedi Ulttyq Banktiń Tólem júıeleri departamentiniń basshysy Erlan Ashyqbekov.
2019 jyly qazaqstandyq emıtentterdiń tólem kartochkalaryn paıdalana otyryp júzege asyrylǵan qolma-qol aqshasyz jasalatyn tólemder men aqsha aýdarymdarynyń jalpy sany jáne kólemi 2 eseden asa ósip,14,1 trln teńge somasyna 1,2 mlrd tranzaktsııany qurady.
Bank qyzmetterin tsıfrlandyrý deńgeıiniń ósýimen halyqtyń onlaın tólemder men aqsha aýdarymdaryn júrgizýge qyzyǵýshylyǵynyń ósýi baıqalady. 2019 jyldyń qorytyndysy boıynsha bankterdiń ınternet/mobıldik servısterinde 19,7 mln paıdalanýshy tirkeldi, onyń ishinde paıdalanýshylardyń ortasha alǵanda 36%-y bankterdiń onlaın servısterin turaqty paıdalanǵan.
Tıisinshe, qolma-qol aqshasyz operatsııalardyń negizgi úlesi onlaın tásilmen: 9 988,2 mlrd teńge somasyna 629,2 mln onlaın operatsııa júrgizildi. Bul qolma-qol aqshasyz tólemder men aýdarymdardyń jalpy sanynyń 52,6%-yn, kóleminiń 71,1%-yn ıelenedi.
Osylaısha, árbir ekinshi qolma-qol aqshasyz tranzaktsııa bankterdiń ınternet/mobıldik servısteri arqyly júrgizildi. Mundaı operatsııanyń ortasha somasy 15 874 teńgeni qurady.
