Ulttyq bank ınflıatsııaǵa jol bermeıtin sharalar qabyldady

ASTANA. QazAqparat - Bıylǵy jyly ınflıatsııa 5-7 paıyzdyq nysanaly dálizde qalady. Bul týraly búgin Májiliste «2018-2020 jyldarǵa arnalǵan respýblıkalyq bıýdjet týraly» QR Zańyna ózgerister men tolyqtyrýlar engizý týraly» zań jobasyn talqylaý kezinde Ulttyq bank tóraǵasy Danııar Aqyshev málim etti, dep habarlaıdy QazAqparat.

«2018-2020 jyldarǵa arnalǵan respýblıkalyq bıýdjettegi ózgeristerdiń parametrleri Ulttyq banktiń kelisimi boıynsha aǵymdaǵy jyly jeke makroekonomıkalyq kórsetkishterdi qaıta qaraýǵa negizdelgen. 2018 jylǵy qańtar-qyrkúıek aılarda ınflıatsııa 3,3 paıyz boldy, bul ótken jyldyń sáıkes kezeńinen tómen. Qyrkúıektegi jyldyq ınflıatsııa ótken jyldyń sońyndaǵy 7,1 paıyzben salystyrǵanda 6,1 paıyzǵa deıin tómendedi. Ulttyq banktiń baǵalaýy boıynsha bıylǵy jyly ınflıatsııa 5-7 paıyzdyq maqsatty dálizde qalady. Al 2019 jyly ol 4-6 paıyzdyq jańa tómen maqsattyq dálizdiń joǵary shekarasynda qalyptasýy kerek», - dedi UB basshysy.

Onyń sózine qaraǵanda, ınflıatsııanyń ósýine jol bermeý úshin Ulttyq bank 15 qazanda bazalyq stavkany 9 paıyzdan 9,25 paıyzǵa deıin kóterý týraly sheshim qabyldady. Bazalyq stavkanyń jańa deńgeıi teńge aktıvterine suranysty arttyrady jáne qolaıly aqsha-nesıelik jaǵdaılaryn saqtaýǵa múmkindik beredi.

Eske sala keteıik, keshe Danııar Aqyshev jyl sońyna deıin ınflıatsııa deńgeıi 5-7 paıyzdyq nysanaly dálizde saqtalatyndyǵy týraly aıtty.