Ulttyq bank: Inflıatsııa maqsatty dálizde saqtalady

NUR-SULTAN. QazAqparat - Parlament Senatynyń jalpy otyrsynda QR Ulttyq bankiniń tóraǵasy Erbolat Dosaev áleýmettik qoldaýǵa arnalǵan shyǵystardyń artýy ınflıatsııalyq protsesterdi jedeldetýge aıtarlyqtaı áser etpeıtinin aıtty, dep habarlaıdy QazAqparat tilshisi.

Onyń atap ótýinshe, 2019-2021 jyldarǵa arnalǵan respýblıkalyq bıýdjetke ózgerister ólshemderi aǵymdaǵy jylǵy jekelegen makroekonomıkalyq kórsetkishterdi qaıta qaraýǵa negizdelgen. Qazaqstan Ulttyq Banki bul ózgeristermen kelisti jáne qoldady.

«Qazaqstan Ulttyq banki ınflıatsııalyq targetteý saıasatyn júrgizýin jalǵastyrady. Ulttyq banktiń 2019 jylǵa arnalǵan negizgi maqsaty - ınflıatsııany 4-6 paıyz dálizde ustap turý. Jyldyq ınflıatsııa 2019 jylǵy naýryzda ótken jyldyń sońyndaǵy 5,3 paıyzben salystyrǵanda 4,8 paıyzǵa deıin tómendedi», - dep habarlady E. Dosaev.

UB basshysynyń aıtýynsha, áleýmettik qoldaýǵa arnalǵan qosymsha qarajattyń bólinýine baılanysty shyǵystardy ulǵaıtý - ınflıatsııalyq protsesterdi jedeldetýge aıtarlyqtaı áser etpeıdi. Baǵalaýǵa sáıkes, ınflıatsııa aǵymdaǵy jyldyń qorytyndylary boıynsha nysanaly dáliz sheginde saqtalady.

Onyń sózine qaraǵanda, bazalyq mólsherleme aqsha-nesıe saıasatynyń negizgi quraly bolyp qalady. Qazaqstan Ulttyq banki mólsherlemeniń deńgeıin eldegi naqty jáne kútiletin ınflıatsııanyń mólsherlerine, tólem balansynyń jaı-kúıin anyqtaıtyn syrtqy faktorlarǵa, sondaı-aq ekonomıkalyq damýdy qoldaý qajettiligine qaraı belgileıdi.

E. Dosaev 4 naýryzda Qazaqstan Ulttyq Banki bazalyq mólsherlemeni 9,25% deńgeıinde qaldyrǵanyn eske saldy. «Biz ınflıatsııalyq kórsetkishterge qol jetkizý men ekonomıkanyń ósý qarqynyn saqtap qalý teńgerimine baǵyttalǵan bazalyq mólsherleme boıynsha saıasatty jalǵastyrýǵa nıettenemiz», - dep QR UB tóraǵasy.