Ulttyq bank 1 tamyzdan bastap bank sektory aktıvteriniń sapasyn baǵalaýǵa kirisedi
Prezıdent tapsyrmasyna sáıkes, bank sektory aktıvteriniń sapasyn baǵalaý (AssetQualityReview - AQR) júrgiziledi. Bul protsess 1 tamyzdan bastalady jáne elimizdegi bank sektory aktıvteriniń shamamen 87% quraıtyn 14 iri bankke qatysty bolady.
AQR - bank sektorynyń qarjylyq turaqtylyǵyn keshendi baǵalaýdy júzege asyrý boıynsha álemdik naryqtaǵy jalpyǵa belgili tájirıbe. Bul - bankterdiń kapıtalǵa qajettiligin anyqtaýǵa, portfeldiń sapasyna baǵa berýge, kredıtteý tájirıbesin taldaýǵa múmkindik beretin dıagnostıka.
Ulttyq bank júrgizip otyrǵan jumys úsh negizgi maqsatty kózdeıdi:
Birinshiden, negizgi bankterdiń qarjylyq jaǵdaıy týraly qoljetimdi aqparattyń sapasyn arttyrý esebinen barlyq bank júıesiniń ashyqtyǵyn qamtamasyz etý.
Ekinshiden, bankterdiń qarjylyq jaǵdaıyn jaqsartý úshin túzetý sharalaryn anyqtaý jáne endirý esebinen qarjylyq turaqtylyqty nyǵaıtý (qajet bolǵan jaǵdaıda).
Úshinshiden, Qazaqstanda jumys isteıtin bankterdiń senimdiligin kórsetý esebinen ınvestorlar men salymshylar tarapynan senimdi arttyrý.
Bankterdiń qoldanystaǵy bıznes-protsesterin jetildirý (úzdik halyqaralyq praktıkaǵa sáıkes), naqty ekonomıkany kredıtteýdi jandandyrý jáne Qazaqstan halqy úshin kórsetiletin qyzmetterdiń sapasyn jaqsartý rásimniń nátıjesi bolady.
Budan basqa, áleýetti ınvestorlar úshin qarjy sektorynyń ashyqtyǵyn arttyrý esebinen jalpy alǵanda, Qazaqstannyń ınvestıtsııalyq ahýaly jaqsarady dep boljanyp otyr.
AQR 2019 jylǵy jeltoqsanda aıaqtalady.
