Ulttyq ulannyń «Jas búrkit» klýby «Aıbynda» erekshe kózge tústi
ASTANA. KAZINFORM – 19 maýsym kúni Almaty qalasynda «Aıbyn» X halyqaralyq áskerı-patrıottyq jastar jıyny bastaldy. Dástúrli jıynda Ázerbaıjan, Belarýs, Qazaqstan, Qyrǵyzstan, Reseı jáne Ózbekstannan 14-17 jas aralyǵyndaǵy 750 jas patrıot baq synap jatyr. Áskerı-patrıottyq jıyn Keńes Odaǵynyń batyry, Halyq qaharmany, táýelsiz Qazaqstannyń tuńǵysh Qorǵanys mınıstri, armııa generaly Saǵadat Nurmaǵambetovtiń týǵanyna 100 jyl tolýyna oraılastyryldy.
Áskerı-patrıottyq oıynnyń ashylý saltanatynda Prezıdent Qasym-Jomart Toqaevtyń Qazaqstannyń jas patrıottaryna joldaýyn Qaýipsizdik keńesiniń hatshysy Ǵızat Nurdáýletov oqydy. Onda jıynnyń áskerı qyzmettegi tártip pen jaýapkershilik, ózara kómek pen uıymshyldyq joǵary nátıjelerge qol jetkizý múmkindiginiń kepili ekeni aıtylǵan.
Jıynnyń ashylý saltanatyna QR Qaýipsizdik Keńesiniń hatshysy Ǵızat Nurdáýletov, Qorǵanys mınıstri general-polkovnık Rýslan Jaqsylyqov, Ulttyq ulannyń «Ońtústik» óńirlik qolbasshylyǵynyń qolbasshysy general-maıor Talapker Ámireev jáne onyń tárbıe jáne áleýmettik-quqyqtyq jumystar jónindegi orynbasary polkovnık Nııaztaı Álkeshev, halyq batyrynyń qyzy Aısulý Nurmaǵambetova, sondaı-aq sheteldik qonaqtar, elimizdiń áskerı-patrıottyq klýbtary men oqý oryndarynyń tárbıelenýshileri qatysty.
– Eldiń damýy men gúldenýi, onyń keleshegi jas urpaqqa tikeleı baılanysty. Bolashaq el sarbazdaryn jastaıynan jaýyngerlikke baýlý, olardyń boıyna otanshyldyq erlik rýhty qalyptastyrý – qazaqstandyqtardyń ortaq paryzy. Memleket basshysy byltyr búkil armııalyq keńeste «Jas sarbazdy» ulttyq deńgeıge kóterý kerek ekenin aıtty. Osyndaı is-shara kóp bolsa, bolashaqta patrıot jastardyń da qatary kóbeıetinine senimdimin, - deıdi general-maıor Talapker Ámireev.
«Álı» oqý-jattyǵý ortalyǵynda ótken jıynnyń alǵashqy kúninde Ulttyq ulannyń 6654 áskerı bóliminiń qaramaǵyndaǵy «Jas búrkit» áskerı-patrıottyq klýby eki nomınatsııa boıynsha jeńimpaz atandy. Avtomatty tolyq bólshekteý men jınaqtaý, sondaı-aq asyq atý oıyndarynda Qarakemer kentiniń M.Lomonosov atyndaǵy mektebiniń patrıottyq synyby úzdik dep tanylyp, І oryndy ıelendi. Ulttyq ulan bastamasymen qurylǵan «Jas búrkit» klýbynyń áskerı-patrıottyq synyptary elimizdiń barlyq óńirindegi áskerı bólimdermen birlesip, jastar saıasaty, ulttyq ıdeologııa baǵytynda jemisti eńbek etýde.
Ulttyq ulan «Jas búrkit» qozǵalysy arqyly jastardyń boıyna úlkendi qurmetteý, urpaqtar sabaqtastyǵy, ulttyq tarıh pen májenıetti taný, eń bastysy Otandy súıý syndy qundylyqtardy sińirýge yqpal etýde. Bul olardyń patrıot bolyp qalyptasýyna, jan-jaqty bilim alýlaryna, sportpen jáne qoldanbaly ǵylymdarmen shuǵyldanýyna, bolashaqtaryn el qorǵaý isimen baılanystyrýǵa kómekteseri sózsiz.
