Ulttyq ulanǵa 7 000 jas sarbaz shaqyrylady
ASTANA. KAZINFORM – Prezıdent Jarlyǵyna sáıkes Ulttyq ulan qataryna kóktemgi merzimdi áskerı qyzmetke shaqyrý júrgiziledi. Ol Qarýly Kúshterge, basqa da áskerler men áskerı qurylymdarǵa shaqyrý tártibimen júzege asyrylady.
— Jyl saıyn Ulttyq ulan qataryna 14 myńnan astam azamat shaqyrylady. 2025 jylǵy kóktemgi shaqyrý naýqany aıasynda 7 000-ǵa jýyq azamatty áskerı qyzmetke qabyldaý josparlanyp otyr. Áskerı bólimderdi jasaqtaý 20 mamyr men 30 maýsym aralyǵynda ótedi, — delingen habarlamada.
Sarbazdar negizinen respýblıkalyq jáne oblystyq mańyzy bar qalalarda ornalasqan áskerı bólimderde qyzmet etedi. Olardyń mindetine mańyzdy memlekettik nysandardy kúzetý, ishki ister organdarymen birlese qoǵamdyq tártipti qamtamasyz etý, sondaı-aq qylmystyq-atqarý júıesi mekemelerin kúzetý kiredi.
Qazirgi ýaqytta Ulttyq ulan áskerı bólimderiniń ókilderi qorǵanys isteri jónindegi basqarmalarda shaqyrylýshylardy aldyn ala zerdeleý jáne jasaqtaý sharalaryn júrgizip jatyr.
Aıta keteıik, merzimdi áskerı qyzmetshilerdi qoldaý maqsatynda 2024 jyly Qarýly Kúshterge, basqa da áskerler men áskerı qurylymdarǵa 3 000 bilim granty bólindi. Onyń 1 267-si Ulttyq ulan áskerı qyzmetshilerine buıyrdy. Olardyń 22-si merzimdi qyzmetin ótegennen keıin Ulttyq ulan Akademııasyna oqýǵa tústi. Endi Otan qorǵaýshylar leıtenant shenin alý jolynda bilim alyp jatyr.
Aıta ketelik sý tasqynynyń saldaryn joıý úshin 10 000-ǵa jýyq áskerı qyzmetshi jumyldyrylatynyn jazǵan edik.