Ulttyq ulan áskerı qyzmetshileri Túrkistanda 3 jasar qyzdyń ómirin saqtap qaldy
TÚRKІSTAN. KAZINFORM – QR ІІM Ulttyq ulanynyń 6506 áskerı bóliminiń áskerı qyzmetshileri 3 jasar qyzdyń ómirin saqtap qaldy.
Oqıǵa 1 qarasha kúni saǵat 14.00 shamasynda Qudaıbergenov kóshesindegi dúkenderdiń birinde bolǵan. Jaǵdaı kenetten bastaldy: «Volkswagen» markaly kólikten qolynda kishkentaı qyz bar er adam júgirip shyǵyp, ótip bara jatqan adamdardan kómek surady. Bul jaǵdaıdy baıqaǵan áskerı qyzmetshiler oılanbastan kómekke keldi. Qatardaǵy jaýynger Nurbolat Seısenbekov jaǵdaıdy baǵalap, dereý alǵashqy medıtsınalyq kómek kórsetýge kiristi, al osy ýaqytta serjant Janbolat Dúısenbaı jedel járdem shaqyrdy.
Ýaqtyly kórsetilgen alǵashqy medıtsınalyq kómek jedel járdem kelgenge deıin qyzdyń jaǵdaıyn turaqtandyrýǵa múmkindik berdi. Áskerı qyzmetshilerdiń kásibıligi men tabandylyǵy balanyń jaǵdaıyn turaqtandyrýda sheshýshi ról atqardy.
«Árqashan muqtaj adamdarǵa kómektesýge daıynbyz. Bul bizdiń jumysymyz», - dep atap ótti qatardaǵy jaýynger Nurbolat Seısenbekov.
Qyzdyń otbasy áskerı qyzmetshilerge jedel áreketteri men kásibıligi úshin alǵysyn bildirdi.
«Biz olar bolmaǵanda ne isteıtinimizdi bilmeımiz. Naǵyz batyrlarǵa alǵysymyz sheksiz», - dedi qyzdyń anasy.
Keıin qutqarylǵan qyzdyń ata-anasy Túrkistan qalasynda ornalasqan 6506 áskerı bóliminiń 3 jedel maqsattaǵy batalonyna áskerı qyzmetshilerge erligi úshin jeke alǵys aıtý úshin arnaıy keldi.
