Ulttyq ulan alǵash ret jasandy ıntellekt qoldanylǵan kontsert berdi
ASTANA. KAZINFORM — Taraz qalasynda QR ІІM Ulttyq ulanynyń qurama orkestri alǵash ret mýzykalyq týyndylarǵa jasandy ıntellekt elementteri engizilgen kontsert ótkizdi. Bul týraly Ulttyq ulannyń baspasóz qyzmeti málimdedi.
«Jaına, Tarazym!» atty shyǵarmashylyq kesh Mádenıet jáne óner qyzmetkerleri kúnine oraı uıymdastyryldy. Kontsert áskerı dırıjerlerdiń 5513 áskerı bóliminiń bazasyndaǵy úsh kúndik oqý-ádistemelik jıyny aıasynda ótti.
— Jambyl oblysynda ótken is-sharaǵa elimizdiń ár óńirinen kelgen Ulttyq ulannyń 20 áskerı orkestr jetekshileri jınaldy. Olar birneshe kún boıy biliktiligin arttyryp, tájirıbe almasyp, áskerı mýzykany damytýdaǵy zamanaýı úrdistermen tanysty. Іs-sharanyń negizgi jańalyǵy — birqatar mýzykalyq shyǵarmalardy ázirleý men óńdeýde jasandy ıntellektti paıdalaný, — delingen habarlamada.
Bul tásil tanymal týyndylardyń dybystalýyn basqa qyrynan ashty, sondaı-aq olardyń kórkemdik qundylyǵy men ulttyq naqyshyn saqtaı otyryp, jańasha ún syılady. Baǵdarlamada «Kerneı», «Jaına, Jambyl», «Ana týraly jyr» jáne «Qazaq ulany» shyǵarmalary oryndaldy. Áskerı orkestrdiń kásibı oryndaýy men zamanaýı tehnologııalardyń úılesimi týyndylarǵa jańa reńk berip, kórermen tarapynan joǵary baǵalandy.
Aıta keteıik, jasandy ıntellektige negizdelgen kameralar Ulttyq ulan sarbazdaryn baqylap otyrady.
