Ulttyq sport qaýymdastyǵynyń prezıdenti taǵaıyndaldy
ASTANA. KAZINFORM — Erkebulan Ilıasov Qazaqstannyń Ulttyq sport qaýymdastyǵynyń prezıdenti bolyp saılandy, dep habarlaıdy Týrızm jáne sport mınıstrligi.
1 aqpan kúni — Qazaqstan Respýblıkasy Ulttyq sport qaýymdastyǵynyń kezekten tys jalpy otyrysy ótti. Otyrysqa QR Týrızm jáne sport mınıstriniń orynbasary Serik Jarasbaev, sondaı-aq, elimizdiń ulttyq sport federatsııalarynyń prezıdentteri men ókilderi qatysty.
Jıynda ulttyq sport qaýymdastyǵynyń prezıdenti qyzmetin atqarǵan Islambek Saljanov sońǵy eki jyldaǵy atqarylǵan jumysy jaıynda keńinen esep berip, qorytyndylady. Qaýymdastyq quryltaıshylary daýys berý arqyly jańa jarǵy qabyldap, nátıjesinde Erkebulan Saıdollauly Ilıasov biraýyzdan Qazaqstan Respýblıkasy Ulttyq sport qaýymdastyǵynyń prezıdenti bolyp saılandy.
Jańadan saılanǵan prezıdent Erkebulan Saıdollauly senim bildirgen barsha QR Týrızm jáne sport mınıstrligine, qaýymdastyq qataryna kiretin ulttyq sport ókilderine alǵys aıtyp, 2025 jylǵa qoıylǵan josparymen bólisti.
Otyrys barysynda Serik Jarasbaev Islambek Tóleýbaıulyna ulttyq sporttyń damýyna qosqan úlesi úshin alǵys bildirip, jańa prezıdent Erkebulan Saıdollaulyna sáttilik tiledi. Sonymen qatar, ol barlyq federatsııalardyń yntymaqtastyǵyn nyǵaıtyp, ulttyq sport túrlerin álemdik deńgeıde nasıhattaý úshin birlesip jumys isteýge shaqyrdy. Erkebulan Saıdýllauly Ilıasov — «Alageum Electric» KT Dırektorlar keńesiniń Tóraǵasy, Qazaqstan Respýblıkasy jamby atý, arqan tartys federatsııalarynyń prezıdenti jáne «Ulttyq sport qory» ulttyq sport túrlerin qoldaý qorynyń negizin qalaýshy, quryltaıshysy.
Osyǵan deıin «Qazaqstan halqyna» Qoǵamdyq qoryn Lázzat Shyńǵysbaeva basqaratyny belgili boldy.